الفقد واليتم مع شيخوخة الحيله=صارن حياته وابوه وعمه وخاله
اسرج همومه ولبّسها ظهر خيله=لاتنشده بس ّ دقّق تعرف الحاله
عنده يموت الطموح اللي غزا جيله=متراكيٍ والحنين اللي على جاله
ماغير حلمٍ يجوع وهزّ له ذيله=قهواه من دلّته ماهزّ فنجاله
يقدع من الضيق ويغنّي مواويله=ماغير تمر الضياع اللي غشى باله
سد الحنان انكسر من معمعة سيله=مايحتمل جوعه وتكبيلة جباله
يمه: يبه : يسأل الخلان : وشّي له ؟=وشلون الاحساس بالآباء ياخاله؟
حكاية الليل نسيَتْ نغمة الشيله=همس الأمومه بها منهدّ تمثاله
وين الحنان ايتقهوى من معاميله=وين الحضن لاغفى يستوطن سهاله
يقرب من الحلم لكن يبتعد ميله=ولالقى له اثر حتى مع الباله
صحرا جفافه ترجّى نبع من نيله=واستأنست نفسه الحسره وغرباله
ياما غرق دمع كمه مع مناديله=ياما ظما شوق في حله وترحاله
ويوم اقتنع بالجفاف وقلة الحيله=رسم حنانه على ارضه ومنزاله
مفترشٍ الصدر رغم الجور بالكيله=ومتغطيٍ بالسما والجرح مغتاله