أبي أترجل .. لو مناخ الفكر جاف=وأبي افتح أوراقي وأعطر سطوري.
بالمفردات الطاهر حق .. وانصاف=وأقول يابكرات الافكار دوري.
‏وطوفي بصدري طوفه الحاج ياطاف=تباركي بي واسجدي في شعوري.
سجود شكر وخلي السرد شفاف=عشان يزها في عيوني حضوري.
انا السما لو مالها حس وأطراف=وانا الفضا لو المجال محصوري.
وانا الخيال اللي تفرد بالأوصاف=يامنكرين النور والنور نوري.
شدو ركايبكم على الطرق والقاف=شدو عليه ولا يجيبه قصوري.
أسروه مسرى لليل بسراج عراف=يضوي على وكر(ن) شمال مهجوري.
والليل به له فجوة ما تبي لحاف=الينتصف كني عليها محشوري.
فجوه لها نشوه ونكهه ومشراف=يا أرقبت به قامت تلاحم كسوري.
يشرف على وقت به المور والهاف=وقت(ن) مضى قلبي عليه معصوري.
به البشر ما دلبحة لآم الأرداف=ولا برزت به ردف بنت(ن) جسوري.
راكد محيطه مانكسر فيه مجداف=ولا رد به شيخ" ولا شاخ نوري.
فزعه وطيب ونخوة نفوس(ن) خفاف=ماهم ثقال نفوس والفكر ثوري.
متكاتفين(ن) ... لو تباعدن الأكتاف=متعاطفين(ن) ... غرسهم ما يبوري.
أحرار نسل أحرار ومعاشر أشراف=الجار عند الجار دمه يفوري.
ماهو مثل هالوقت طاريه ينعاف=رفع مقام أهل الرمم و ........... .
وقت(ن) تفاخر به سلوقي وبلاف=ويامر وينها به صعيدي وسوري.
وعن لا أزيد الطين بله وينشاف=أبي امنع التصوير لو كان فوري.
وأبترك الملعب وابي العب بالأطراف=واشره على نفسي لو الدور دوري.
واعطي عناوين السهر داخلي طاف=وأريح جفوني وأداري شعوري.
وابقى بداخل جوي الممحل الجاف=لو كان من حقي اعطر سطوري.