قامـت تراقـص بالجـوارح شياطـيـن=وجـنّ الغـلا جنـدل لهـا الـف فـارس
فتنـة جـمـال وفـجـرت بــي براكـيـن=وغنّت بي الحـانٍ بصـوت النـوارس
يرجـح حلاهـا فـي كفـوف الموازيـن=وإلا الحسـب ظـلٍ لهـا دوم حــارس
فــي مدرستـهـا راسـبـات المزايـيـن=وانـا بهـا امحاضـر وحصـه ودارس
زينٍ لبس رمشي وهيمن على العين=وعَجْزَتْ اتدرّس وصفته بالمـدارس
يافاتنـه اروي ظمـا الشـوق تكفـيـن=جـنّ الغـلا لاجلـك ذبـح الـف فـارس

ماكنت أحسب ان الزهر يحضن الشوك=ولا كنت اظن اني معك طيف عابر
توّي دريت الحلم تافه ومحبوك=وان القلم ضايع بكذبة محابر
واجهت نارك مانطق جلدي أحّوك=وادركت بي ان المراجل مخابر
هدوءك اصخب في فؤادي من الروك=ومع كل هذا لغور الإحساس سابر
عيّشتك بعرشٍ من التبر مسبوك=ومارست بي سطوة نفوذ الجبابر
واسكنتك ببرجٍ من العاج مدكوك=وافردت لك كلمة تهز المنابر
كل الجوارح باعذب الحب غذوك=ولك بالغلا سيلٍ يسد المعابر
ويوم ان احاسيسي بالالحان غنّوك=عزفت لي لحن الجفا والمكابر
صحّتني اطيورٍ من الطهر عرّوك=وانهن بصدري سطوة احساس غابر
الحظ من قبلك وهو باب مصكوك=ومن عقبك اللي باقيٍ للمقابر
صحيح لاقيل ان الزهر يحضن الشوك=واكبر دليل احساس بنت الأكابر