يالله يامنشي سحاب المخيله=يامنجي ابراهيم من لاهب النار
يامنزل القران راع الفضيله=انك تقديني على الزين واختار
وسجلت من زين القوافي جزيله=واسندت للي بالمراجل له اذكار
وشديت جيبً مايشادى مثيله=هومنوت اللي عاشقين للاسفار
من شركته مجيوب باحر موديل=وعداد طبلونه ترا كله أصفار
عبد اللطيف مورده هو كفيله=ومأمنن عن الحوادث والاضرار
أللي عجز عن قيمته عزتيله=من نوع لكزس بالثمن غال الاسعار
يطوي مسافات الخطوط الطويله=وليا مشى ماحداً ييطوفه مع القار
يلفي على راع العلوم النفيله=الشيخ ابو ممدوح من ساس الاحرار
قرمً يهلي ساعة انك تجيله =بكلام أحلى من لبن در الابكار
وفنجال صفرًمزعفرات بهيله=يرهي لهن من غالي البن وأبهار
وذباح حيلاً للنشاما جزيله=مقلطاتً للمسايير والجار
هزاع شوق اللي تنقص جديله= من ساس قومً مايهابون الاخطار
أهل العليا بالسيوف الصقيله=بيمانهم كم راس شيخ بها طار
يركون في كبد المعادي مليله= وعدوهم يوم القى غير ينهار
ثمان أجموعً بالملاقى ثقيله=وافعالهم ماتنحصى عد وكثار
ونشكرك يابارز أمجاد القبيله = والفت ديوان يوزع بالقطار
جبت الصحيح موثقً دون ميله=راوي أديب والامانه لك أشعار
شرواك فوق العين قدره نشيله=ومعاشرت أهل الوفى تزيد الاعمار
مثل جنابك دايماًننتبيله=وبالقلب لهعندي معزه ومقدار
الطيب لاهل الطيب يبقى خصيله=خصيلة الطيب على الجود صبار
ولا الردي مثل ضحيح الثميله=ماها قليل وجمها سيل الامطار
والرس ماورد جموعً محيله =ليا غرفته غرفتين غدا غار
وص الردي مثل كداد السليله=شوك زهرها وغصنها مابه اثمار
ودنياك هذي ياسنافي معيله= يما هفابه من سلاطين وامار
بدروبها كم ضيعت من دليله= بها صليب الشور والراي يحتار
أن عاضبت مافيه طبً وحيله= ماتنهزع لو ينهزع حيد سنجار
وأن اقبلت تعطيك ماهي بخيله= ترفعك لو انك مع السوق سمسار
والقاف ماني بالمثايل مطيله =والمعذره نطلبكم ياوف الاشبار
وصلوا عدد ملاح برقً بليله= على النبي الـهاشمي سيد الاخيار