من شمال المملكه لارض الكويت=جيتكم والشوق هيجني شعر
ماحسبت لعنوتي يومي عنيت=بين سكرة ليلن وصحوة فجر
في أغسطس آب شيبت وشقيت=ماتت الفرحه على وجه الثغر
وفي شهر فبراير اينعت وحييت=يوم ربي لبّسه ثوب النصر
موطنٍ ثاني ولا مثله لقيت=بلسم الضيقه وترياق القهر
ضحكة ارضه رحبت بي من لفيت=وآتهجا الحب بعيون البشر
ديرةٍ لامن بعزتها لجيت=تستند برجال عزٍ للظهر
الشيوخ اللي بقلبي ماحييت=الصباح اللي محبتهم سحر
من منابع طيبهم حب ارتويت=ومن مواقفهم عقولك تنبهر
ياصباح الحب لامنك مشيت=كل خطواتك بها طشة مطر
تنبت بيمناك لامنك عطيت=نخلةٍ في ظلها مات الفقر
كانت اليسرى غريقه بالمبيت=ماقرت من مدتك أية سطر
ادري انك بالعطايا مارجيت=غير ذل الهم واكثار الأجر
ماسجدت ولا ركعت ولا انحنيت=غير للي عنده احكام القدر
وانتم اللي في محاجركم قريت=جملة الترحيب وافعال الأمر
والله اني في محبتكم بليت=ماأفرق بين بدون أوحضر
ودي اشكر كل شخص وكل بيت=من مشا لي شبرٍ اركض له متر
إدر ياللي مابعد توك دريت=إن اهل هالدوله لعيني نظر
كلهم متقن فنون الأيتكيت=بالتعامل والثقافه والفكر
من سمو اقدارهم حتمآ سميت=والجمايل ساكنه عرق النحر
اعتبرني في مشاعرهم ربيت=والدليل الضحكه وريح الزهر
بين بسمتهم وفزعتهم سعيت=وطافت حروفي على ركن الشكر
اعذروا قصر القصيده بيت بيت=قدركم ماياخذه وسع الصدر
بس والله ياجماهير الكويت=انتم الكمبود واشواقي جمر