من يلوم اللي اذا شافك وقف = يابو تركي قدركم والله كبير
المهابه ما تجي زيادة ترف = علمها عندي أنا فيها خبير
المهابه من التواضع هي شرف = هي محبه صافيه لجمع ٍ غفير
هي نتيجة طيب كل ٍ به عرف = هي نتيجة طبع صافي بالضمير
لك يمين بطيبها دايم ترف = رفرفة أعلام موسى بن نصير
يانسل رجل ٍ بطيبه له ملف = يعرفونه لابته منهو صغير
بلابته حمر النواظر إنّعَرف = الردي فيهم تحسّ إنه أمير
المطر تحيّا به الأرض وتزف = البشاير للعرب بوقت ٍ قصير
إرصدوا مزنه شمال من النجف = وحددوا موعد وصوله بالأخير
يوم قرّب قامت بروقه تلف = من سمع رعّده يقول إنه خطير
وجاب نوا ً وابله عيّا يجف = ريحته يفرح بها حتى الضرير
ذاك شوفه للملا أكبر شغف = العرب ترجيه كانه ( نوّ ) خير
وإنت رجل ٍ طيبكم ماله وصف = صعب يوصف بالمطر لوهو غزير
المطر أحيان بقدومه تَلَفُ = ناظروا جده وشوفوا وش يصير
وانت عكسه حيل عنّه تختلف = ما تجي منك المضره كالحرير
تمشي بدنياك قدامك هدف = طاعة الرحمن في برد وهجير
يوم غيرك همّهم جمع التُحَف = إنت همّك اليتامى والقصير
يوم غيرك بالمراقص محترف = إنت دايم حافظ ٍ عهد العشير
كل حرف ٍ بإسمكم شكله هَتف = الثلاث حروف صارت بك تطير
تَهتف وترقص لكم خلف خلف = وإنعذرها لو تغني بك كثير
حتى نوط العزّ منّك إرتجف = كنك الفارس وهو أصبح أسير
جيت شاعر كل شعره لك زحف = راح ليله مع هواجيسه سهير
إيتذكر ليه جرحه ما نزف = ليه عيده مظلم ٍ دامه بصير
إيتذكر كيف ماضيه إنحرف = ويتمنى ليت للكذبه .. صفير
والغريبه ليه هالناس تحلف = ليه كل ٍ حاسب ٍ نفسه وزير
ليه نظلم بَعّضنا دام نعرف = كل ظالم ينتظر يوم السعير
ليت دمع ٍ واقف بعيني ذَرف = ليت صوتي ينتشر عبر الأثير
كل عرق ٍ بالحشا دمه نشف = ليت همي يترك عروقي تسير
صرت كني شايب ٍ صابه خَرف = ما يفرق السراب إمن الغدير
جبت شعر ٍ عاسفه لأجلك عَسّف = وإعتبرني الفرزدق .. أو جرير
ياشبيه الحر يوم إنه خطف = في ثواني صيدته بليّا نصير
سجل إعجابي تراني ( بــ ) اعترف = إفتخر بك في شهيقي والزفير
( ويا ) بن ضويعن لكم منّي أسف = كان شعري عندكم أصبح كسير

صح لسانك اخي مانع ماقصرت كفيت ووفيت
من يعرف ابوه [ضويعن رحمة الله عليه] لايستغرب فعل خلف
فقد كان رحمه الله علم في راسه نار
فهذا الشبل من ذاك الاسد