السلام عليكم ورحمة الله وبركاته :
كل عام وانتم بخير ..
نعتذر لكم عن الإنقطاع الذي كان بسبب ظروف خارجه عن الإرداه ونعود لكم بهذا النص الذي أتمنى ان تغفرون به بعض تقصيرنا على أمل أن تحوز ولو على القليل من رضاكم وإستحسانكم .

قبل السفر ابغى اقول الحقيقه ... إني احــبك حــب ماصــار للــناس
ودام البحر متلذذ ٍ في غريقه ... مع إنه المسكين مــاهـو بغـطـاس
لابـــد يرحــل بس لحظه دقيقه ... ليه النذاله فـيك ماهي على ساس

أحس بكتمة أنفاسي تصّرح للحزن عنوان = ابي أتصنع الضحكه وانا بالحيل زعلاني
لبست ورحت للسهره ولكن داخلي بركان = غريبه كيف ياعالم انا اتحملت بركاني
جلست بدون ما أتكلم وطاني الهم والأحزان = وبيّن خاطري إني وصلت لقمة احزاني
وجابوا سالفة تضحك يحسبوا خاطري شفقان = ضحكت وضحكتي صفرا تقول الهم عنواني
سبايب صاحب ٍ قلبه تقول ملبس ٍ صوان = غريب أطوار ياليته يسويها ... ويجفاني
حبيبي بقطع لساني إذا إني معك غلطان = وإذا إن الغلط منك الا ياليت تنساني
قسم بالله ما أرجع لو دموعك تكبّ الوان = أنا ماقلت لا تخطي ولكن .. لا تحداني
انا شكيّت بالأول بأن نهايتك خوان = ولكن ماعرفت إنك بهالسرعه تغداني
نتخالف يوم والثاني تعود وتطلب الغفران = لو أني مسجل أخطائك عليم الله ديواني
لأني بعدها اصبح عديم الحس والوجدان = ابي انساك لو حبك نقش بأعماق وجداني
الا ياصاحبي حبي له حدود ٍ كما الأوطان = ألا إياك تتعدى حدود الحب باوطاني
انا ماني ترى مثلك لعوب ٍ بالهوى فنان = تمثل كل ادواره وتقول إنك .. تمناني
محال إنه يجي مثلي يحبك والزمن برهان = ولكن كيف تتأكد إذا عانيت حرماني
عطيتك كل وجداني عطيتك ضحكة الحيران = عطيتك عالمي كله وكثير الود وأشجاني
خساره ليه تحسبها حساب الرابح الخسران = تجارة حب والا حب والا احساس علماني
خساره كيف تقتلني وصرت لحضرتك نيشان = احسبك وافيا ً ليه طلعت بيوم عدواني
خساره ليه أشعاري رمتها كفة الميزان = ابيها ترتفع لله تقول الكف خسراني
واذا تبغى تحداني وتمشي برغبة الشيطان = مع اني قلت بالأول أمانه لا تحداني
ابي اعطيك لك نبذه عن اللي شامخ ٍ مالان = ألا يالنازي بطبعك يجي لك يوم تنعاني
أنا فيني بداوة جيل وحبي غالي الأثمان = محال بيوم أتنازل بلبس قناع لبناني
تشوف ان السما عالي محال ٍ يلمسه إنسان = محال انك تغيرني لو إنك مووت تهواني
ألا ياليت ياعمري تقوم تسوي إستبيان = وتدرس سالفة حب ٍ من الأخطاء ذبلاني
شعور الحب لابن آدم كانه فارس الميدان = ولكن وينها حوى بقايا إحساس مرضاني
رضيت بكارثة حبي وقلب ٍ ميت ٍ مرضان = لأني يوم أتذكر وقود النار نسواني
وخذها ياغلا (مانع) صريحه ماتبي إعلان = خطاكم زاد عن حده ولا ضنيت تلقاني
وابي اشكر انا ربي عليها نعمة النسيان = صحيح نموت بالأول ولكن نقتنع ثاني