أحشمك يا راسي عن العيب والريب=وأقضبك عن درب الردى لا تهيّا
درب الردى لأهل الردى به مجاذيب=للي عن الواجب يبون الكفيّا
والطيب ما هو سلعة ٍ للواعيب=هلاَّقة ٍ بالكذب دايم تزيّا
يبغى أقدام ٍ ما تمل النبانيب=ويبغى يدين ٍ بالعطا ما تريّا
وحوادث الأيام تبدي لك الغيب=تفرق لك النادر وطير الحديّا
واللي قضبني من شديد المقاضيب=إما أقوله زين وإلا بليّا
لا شفت أنا أمي دمعها يشلق الجيب=ما ودي إني يا أهل الخير حيّا
تكفون يا شيوخ العرب ما بها عيب=أخوي ما عقبه على الأرض خيّا
أبكيه مثل إبكا شالح على ذيب=وأصيح بأعلى الصوت يا أهل الحميّا
شيمة عرب مالي عليكم مطاليب=تكفون فقده كاوي الصدر كيّا
تكفون يا الجبرين ملاّكة الطيب=بأفعالكم ما هو بسرد الحكيّا
يوم الرجال تجنب العرف تجنيب=صغيركم دون المواجيب عيّا
تكفى يا أبو ماجد عذي المشاريب=الهم طاويني لك الله طيّا
وأنخى بعد ممدوح زين التراحيب=ابن ارمال السمح طلق المحيّا
تكفى عساها لك حجاب اللواهيب=في ساعة ٍ كل ٍ دهته الدهيّا
وأنخى فهد لا يا حصان الأطاليب=حلاّل عقد ٍ منبرم شربكيّا
الطيب يا ابن عبيد عرف ومواهيب=ماهو بجختْ خايب ٍ هلقميّا
وإنتم كسبتوا المرجلة صيب ٍ وشيب ٍ=واللي مكذبني على الشرع هيّا
من مثل شمر ينطحون المواجيب=من مثلهم يركب بنات العبيّا
شمر أهل ردة وتقليطتْ النيب=فازوا بها يوم إن بقعا صبيّا