راكب اللي زاهيه برم الحنيـّه=ماركة ( جي أم ) يعجبك انطلاقه
مدفوعٍ به كاش ميّه فوق ميـّه=من حفيزه جيب ‘ مضمون البطاقه
بالمواتر ما اذكر لي جيب زيـّه=صنع الأمريكان ‘ مصنوع برواقه
لا سحب مع السّهال الجرهديـّه=لغاية السّواق يزداد اشتياقه
ما قطع راعيه وسط المهمهيـّه=غير حكمة ربنا ما شي عاقه
ما يوقّف دون ابو مفلح ‘ بفيـّه=ذاك اللي يمناه ‘ ميزتها الطلاقه
طيّبٍ طيبه كما وبل ابرديـّه=ترعد وبرّاقها زاد انشعاقه
ما مدحته مقصدي نيل العطيـّه=لـكن الموضوع يسمح لي سياقه
من اربوعٍ وصفها بأهل الفضيـّه=يوم بعض الخلق يشكي من ضياقه
بالحرايب ما يهابون المنيـّه=يشربون العذب من قبل انطراقه