مااحترفت الهربده والثرثره=غير ببرنسيستي عين المها
الشعر يزهى بها والغندره=والقصايد في رجاوي ختمها
يادواتي ابحري بالمحبره=وزخرفي عذب المشاعر باسمها
دلة اشعاري بها متبهره=وتقدع افكاري حلايا رسمها
بين وعيي والهرافيل اشعره=اقطعتها في فضاوة حلمها
حكيها عودٍ وفمها مبخره=وابيض من الثلج طاري علمها
ارسمتني بالكحل والمسكره=ونحتت فيني زخارف وسمها
تملك الجوري بياضه واصفره=وتخجل الديباج رقة جسمها
رمش عيني مع مدينة محجره=ميدها في حربها وبسلمها
في دجا الهم بسمايه مقمره=ببؤرة الديجور ساطع فلمها
ونار شوقي في حشاي مجوّره=بلجّة عروقي رماني قرمها
واطيب ارضي في غلاها مسوّره=من عدالتها عشقني ظلمها
وجعل شعري للقبر والمقبره=كان ماعلّق بيارق حلمها