يلعن ابو جد زينك احرق انفاسي=اسلام رمشك طعن في شاعري كافر
رمشك طعني وبؤبؤ عينك يواسي=ومابين قلبي وعقلي لاجلك مدافر
طيفك تعلّق برمشي واقلق نعاسي=وبعرش حلمي تربّع حسنك السافر
غرفت لك من قدر شوقي بملاّسي=عذب الجنون بشرود الفكر متظافر
هيبة حضورك عطتني خلطة إخراسي=ونعامة الحكي هجّت من حلا الصافر
يضيع فكري والبّس قافي لباسي=واغوص في بحر شعري واركب الوافر
ارجع واحاول ارتّب فكرة احساسي=بالرغم من عقلي اللي صار متنافر
جفاك زيرٍ يتوق لذبح جساسي=والحشرجه تلعب بصدرٍ له مزافر
جن انتظارك تلبّس زمجرة باسي=وطعنت طفل الوصل في حربة النافر
عنقاءك وغولك وخلك بوسواسي=وقريت الانعام والإخلاص مع غافر
تهت بحلا مهرتك واسقيتها كاسي=وان كاني اذنبت ربي راحمٍ غافر
طحت وتعثّرت لكن كنت متواسي=وياكبر حظٍ بعقد الماستك ظافر
ماباقي الا بقايا شهقة انفاسي=رمشك هو اللي طلع يامنيتي كافر