انا حبيبي منبع الطيب والـــــــزين = زيـــن العذارى ما وصل ربع زينه
يسوى بنات الشـام والهند والصين = وباريــــس مع لندن وحتى المدينه
ويسوى البدوا عندي واللي مقيمين = وحتى الذي بوسط البحر بالسفينه
ابو عيون ٍ ســـــــود بالكحل يزهين = وكل الحــــــلا موجود بلمعة جبينه
ومبســـــــم ٍ زاد الشهد فيه ضعفين = وزين العذارى مـــا سكه في يدينه
فيــه الحلا والطيب والحسن واللين = عجزت لا اللقى فيــــه شيءٍ يشينه
هـــــو غايتي هو مطلبي بالمزايين = ياليتني اشبك يــــــــدي فـــي يمينه
بالحيل أحبه حـــــب فوق الموازين = روحي وحياتي كلهــــــــا له رهينه
عشــــــرين يوم ٍ كنها عندي سنين = واللي مثل حــــالي عسى الله يعينه
شـــوقي له اكبر من غرام المحبين = شوق ٍ سطا بالـــــــروح بين حنينه
يا أغلى قصيده قلتها بعـــام الالفين = انا حبيبي اليـــــوم ويــنـــي ووينه
روحي وقولي له تـــرى وقتنا شين = واللي حكا بالأمـــــــس لا تسمعينه
خليه يصبر غــــــايتي من القريبين = وانا اوعده يرتاح بــــــــاقي سنينه
يا غير حــكم اللي له الخلق راجين = واللي مـــن الله كلـــــــنــا راضيينه
واوصيه بــامــه تـــرى بـــرها دين = وقولي رضا الله من رضـا والدينه
وصافي المحبه لا حصلت بين قلبين = تسوى كثير المــــال لــــو تملكينه
قـــولي مشـــاعر داخلك لا تخبــــين = ارجوك قـــــولي لـــي مــا تكتمينه