الجــــــــــــــــــــــــا د ة - الصفحة 4

02-01-2009, 02:12 AM

[[ الجــــــــــــــــــــــادة ]]
سلسلة ................قصصية
في حلقات ........منفصلة
سلسلة ........تبحث في قصص.......وأمجاد الأباء والأجداد .....لانتحدث فيها
بل يتحدث فيها رواتها.............عن أنفسهم

[[ الحلقــــــــــة : التاسعـــــــــــ( 9 )ـــة ]]

((.......يقول من هالسنين جيت على قعودي من العراق ابي الفيضة( فيضة الشيخ اورنس ) الله يرحمه . وهاك اليوم الصبح مع شعاع الشمس يوم أقبلت على هاك الشعيب وانا اشوف الدخان يعمت منه وكنت حينها جيعان وقلت خلني انهج له القى عنده طعام . ويم اقبلت ناحية الشعيب وقربت من الدخان وما اشوف أحد حوله واقرب حيل واشوف السماره عنده ويومنها سمارة رجال منجضع ويوم قربت له حيل والقاه نايم وانا انوخ قعودي شوين عنه واجي يمه على رجليه واتنحنح وماقعد وانا اجيه والقاه نايم والطاسة عند راسه على النار وانا ارفع غطاء الطاسة والقى بها ارنب نجضانه وبسرعة اخذ من لحم الأرنب واكل واحط العظام بالطاسة ياما أكلت الأرنب كلها . واغطي الطاسة واركب قعودي وكمل مشوراري يم ناحية أهلي . واروحهم العصير . والقى عندهم خبر أن الشيخ فواز بن شعلان الله يرحمه ... جاي مضافة الشيخ أورنس الشعلان وعقب ما تعشيت عند أهلي جيت مسير يم بيت الشيخ , وانا أسلم واجلس بالمجلس , واسمع هالسالفة :
قال الشيخ فواز ينشد الشيخ اورنس وين مبارك ( حدى مواليه ) قاله اورنس تعبان مايقدر يجي يم المجلس قال الشيخ فواز تعبان ليه ما وديتوه للطبيب وهو وش بلاه قال اورنس مابه خلاف بالحيل ياطويل العمر قال فواز لا أكيد به خلاف حيل ولا انت تعرف يااورنس معتزتي عنده وقد ر محبته لي ما هو معقول يد ري اني هنيا وما يجي يسلم علي . انت تد ري يابو ممدوح اني عطيتك اياه وأمنتك عليه مع انه غالي عندي لازم تخلونه يجي ابي اشوفه . وبعد تأكيد الشيخ فواز على حضور مبارك لمجلسه قام الشيخ اورنس وأرسل من يحضره للشيخ . ويوم جا (مبارك ) وسلم على الشيخ فواز شاف وجهه كله جروح تسيل دم قاله الشيخ فواز له له وش بلاك منهو اللي سوى بك هالسوات الشينه . قال مبارك ياعمي : عمي الشيخ اورنس ضربني اليوم وانا مسامحه . قال الشيخ فواز ليه ياابو ممدوح آفى .... ماهذي الهقوة بك وانا مودعك أياه وداعة عندك تسوي به هالسواة له له!!!! يابو ممدوح ماهذي شرهتي عليك . لازم تعلمني وش جنايته عندك . انا أعرف مبارك زين ما عمره كذب ولا باق ورجل خدوم . قال الشيخ اورنس : والله السالفة ياطويل العمر شي ما ينصدق ؟؟؟ هاللي خلاني اسوي به هالسوات ؟!!. وقال الشيخ اورنس ياطويل العمر هاك اللي صار : البارح وحنا نبي المرواح صدنا هاك الأرنب , قبل لا يصبح الصبح . وقلت لمبارك : حنا نبي نروح لنا مشوار وانت خلك بمراحنا هذا وأطبخ الأرنب لنا وجهزها نتريق عليها ياجينا ومشينا من عنده ويوم جينناه على الوعد ويقوم ويجيب لنا الطاسة ونرفع غطاها وما نلقى بها كود عظام مفصلمات تفصلم , ماهنيا اللحمة اللي تخلق.
واصوت له قلت له وش هذا يا مبارك قال وشو ؟ قلت شوفت عينك!! قال مادري ياعمي قلت ماتدري وشو به؟ ماهوأنت اللي أكلن الأرنب؟ قال لا والله ياعمي !! وما أدري هو أنس وإلا جن !!!. قلت له لا بله انس !! انت اللي أكلت الأرنب وانت نايم ماتدري بحالك !!!. وقمت وضربته وشينت فاله . وهو يحالف لي من هالديان انه ماهو اللي أكل الأرنب .
ويومنه سكت الشيخ اورنس.. قال الشيخ فواز: وش قولك يا مبارك؟؟ قاله ياعمي مثل ما سمعت من عمي الشيخ ابو ممدوح.... هذا اللي حصل اليوم مني ومن عمي .. . قال الشيخ فواز وشلون صارت هالسالفة شين يحير صحيح !!! يعني ماحد يدري منهو اللي أكل الأرنب؟؟ وانا متأكد أنه ماهو مبارك !؟ لأني أعرفه زين .
وهو يسكت المجلس ماتسمع حس أبد , وأنا هناك مدفعن شوين بطرف المجلس وحسي به بركة قلت : تسمح لي ياطويل العمر بالكلام . قال الشيخ أورنس من انت ؟ قلت ياطويل العمر محاكيك (عبيد بن اسماعيل من عشيرة الوهيب من الكواكبه ) , قالي الشيخ ابو ممدوح هاه ....قل...وش اللي عندك , قلت انا أبي أعلمك ياطويل العمر باللي أكل الأرنب وتحطني بوجهك عنه؟ وتراه حدا ضيوفك بهالمجلس . قال الشيخ فواز : قل يارويلي وتراك انت وهو بوجهي عن ابو ممدوح . . قلت :
أنا يامحاكيك ياطويل العمر اللي أكل الأرنب !!. قال الشيخ أورنس أنت أنت !!. قال الشيخ فواز خلاص يارويلي ...قل وسولف وشلون صارت هالسالفة.
وانا اقولها للأمير: هذا ياطويل العمر وياوجيه الخير لي يومين مع الطريق جاي من الرطبه بالعراق واليوم يوم شعشع ضو الصبح وانا أشوف الدخان يعمد من هاك الناحية قلت بنفسي ليه مانحره غديني القى عنده شي يوكل وإلا أشرب لي كاسة شاهي . وانا انحره ويوم قربت له ماسمعت لا شيت غنم... ولاابل!! وأقرب بالحيل منه وأشوف عنده هاك السماره من بعيد وماحولها أحد وانا أقرب حيل ويوم وصلت الشعيب والقى هالك الطاسة اللي مركبة على النار وعندها رجال منجضع وانا انوخ قعودي واجي يمه على رجليه ويوم أقبلت واتنحنح.. واثري الرجال نايم وما قعد بي واتعدى يم الطاسة وأجلع عنها الغطاء وأكل اللحيمات وازبر العظام بها, يما فصفصت الأرنب كلها ..وأغطيها وأركب قعودي وأنحر اهلي . قال الشيخ فواز أكلت الأرنب كلها أكلت الأرنب كلها .. وقام يضحك ... قال الشيخ أورنس والله ياكويكبي لو ما انت من خوالي وضيف لي وبيتي أني لأطلاك مثل ماطليت مبارك .ياما خلي جلدك مثل جلد الأرنب اللي أكلت
. . قال الشيخ فواز لابله يابو ممدوح ترها أخر الطليات لمبارك !!مبارك أبيه ينكس معي .
وهو يرجع مبارك (المولى ) مع عمه الشيخ فواز بن شعلان الله يرحمه ..وانا الله فكني من طيلت ابو ممدوح......... ))

02-01-2009, 04:56 AM

مشكور اخوي اخو صيته والله يعطيك العافية احب انا قصص ربعنا الاولين الله يرحمهم

02-19-2009, 05:37 AM

اخوي سهر

هلا وغلا ومسهلا بك
وبحول الله تعالى غير تسمع من سوالف الغانمين هنيا الكثير والكثير
كل الود لك ,,,

02-19-2009, 05:51 AM

[[ الجــــــــــــــــــــــادة ]]

سلسلة ................قصصية

في حلقات ........منفصلة

سلسلة ........تبحث في قصص.......وأمجاد الأباء والأجداد .....لا نتحدث فيها
بل يتحدث فيها رواتها.............عن أنفسهم

الحلقة: العاشـ( 10 )ـــــــــــــــرة

(( الأمير منيع بن سالم حدى أمراء بني خالد , وهو صحيب لي وخوي دنيا وصديق عمر , وبحدى الليالي قال لي (يا الصلبي ) وزعلت منها باللحيل عشان أنها جت منه , قالي : تقل زعلت مني , قلت أيبله زعلت عليك , قال وليه تزعل وأنت دايم تقولها بقصايدك وما أنت مخفيها عن الناس , قلت له : كلمة الصديق أعظم من الهم والعدوان وغيرهم ما نسأل عنهم ويش مايقولون , لكن اسمع يابن منيع ترها تحدي بيني وبينك , غير يسوي الصلبي السواة اللي أنت ماتقدر تسويها , وتروح السالفه وأخليه ينساها له مدة , وعقب وأنا اقول له : هو انت تسمع بالفهدة اللي عند ابن عمك الأمير محمد الربيعي , قال منيع : عندي خبرها وأعرفها زين هاذي مايقنص إلا هي قدامه وغالية عنده باللحيل , قلت أجل لو طلبتها منه هو يعطيك أياها وأنت لك القدرة والحشيمة والشيمة عنده , أبيك تطلبها منه لي تساعدني بالصيد وأنت مثل ما أنت شايف عيشتي على الله ثم هو , وكاد أنها توفر علي شين واجد , قال منيع بن سالم وبس هاذي , هاذي بسيطة وترها جتك .
وهو يروح لك يم ديرة الأمير محمد الربيعي وضاف عنده , يومنه قلطوا له الزاد قال للأمير : اسمع يامحمد أنا جيتك بحاجه إن عطيتني مطلبي أكلت زادك وإن ما تهيت لي قمت بلا عشا من عندك , قال الأمير الربيعي : الله يحيك وهذا محل لك كل زادك ومطلبك مقضي بأذن الله قال منيع : لابالله ما اذوقه غير تاعدني بها , قال الأمير : تعش وهي جتك كان ماهي هالفهدة اللي رابضة , قال منيع : لابالله هي حاجتي , قال الأمير : يامنيع تراك غالي عندي وأطلب غيرها وكل مانملك من الموالي والبل والخيل تراه بيدك , والفهدة هاذي لي بها شركا ماهي لي ألحالي , شف بيوت العرب درها بيت بيت تلقى قرون الضبا وراها , كسبها نقسمه بينهم , ويقوم من عنده منيع وما أكل عشاه . وهو يجيك يم عربه اللي أنا ضيف عندهم والفهده ماهي معه , قالي لابالله ردني وصارات هي أغلى مني عنده , ويالله كانك برجال تحدى على الشرط اللي بيننا ( توها تفطن عليه حيلتي به ) أنصه وأطلبها منه ألينه ما يعطيك أياها وأنت لا عارف ولا معروف , ولا مرة بحايتك شفته ولا هو شافك .
وأركب لك من عنده لي حمار به الركض وأجيك ناحر ديرة الأمير محمد الربيعي , وأول ماطبيت على الرعيان وأسأل عنه قالوا قناص ويأخذ له عدة أيام , وأجيك ناحر صوب بيت الأمير ضيف لاعارف ولا معروف والركوبه حمار , واقعد قدام البيت اللي خالي من الرجال , يومنه جا الليل وجا حزة العشا وأنا بمكاني ياهو هذاك الوليد (صبي ) ينقل بيده ماعون به طعام وجهه يمي وقبل لا ياصلني بجية الراعي وهو ياخذه منه وقاله : خله عنك أنا اللي جيعان والضيف كانه ضيف صحيح أحلب له من النياق , وأفلست من الزاد وصار عشاي لبن صميل , وأمرح هاك الليلة والصبح اركب حماري واجيك ادور على الأمير محمد الربيعي وأنشد عنه يما وصلته , وحطيت سالفة أخذت الراعي لعشاي هي حجتي اللي أكسب بها التحدي , يوم وصلته اودعت حالي ما أعرفه وهو أكيد مايعرف شكلي ولا عمره شاف رقعة وجهي , واجيه بوسط خوياه والفهده رابظة بلزه , وهو ينشدني : من وين جيت , قلت : من عرب فرق الله شملهم , وقمت ادعي عليهم من هالدعاوي , قال لي الأمير : ليه وش اللي جاك منهم , قلت ما ظيفوني الله يخزيهم من عرب , وقلت بهم لي بيوتات :

يقول الخلاوي والخلاوي راشد = تخطّر من بين البيوت وضاف
تخطّرت إلى بيت الربيعي وافد = ولا أنـجاه مما كان منه يخـاف

وهو ينشدني الأمير : هو أنت تعرف الربيعي , قلت لابالله ما أعرفه ولايسرني عرفه , قال الأمير : هو فيه أحد غيرنا سمع منك اللي قلته به ( يقصد الأبيات – لأنه اذا لم يسمع بها أحد يريد قتله ) قلت : أيه وكاد ما خليت من عيال ورعيان العرب ما سمعتها أياه , وعرفوا أني راشد الخلاوي , قال الأمير الربيعي : وصلت يالخلاوي أنت هاللحين ظيفي وتراك تخاوينا يم عربنا يارجعنا , وشلك عاد بالربيعي وعلومه اللي ماهي زينه , ويرجع الأمير من المقناص ويومنه وصل أهله وهو ينشد عن السالفه اللي صارت للضيف عقبه , وعرف أنها صحيحه , وعرف أني عرف أنه هو الربيعي من البيت والموالي اللي عنده , وهو يجي يمي وقال : اسمع يالخلاوي أنا اعرفك ولا شفتك وأنت شفتني ولا تعرفني , أنا محمد الربيعي اللي أنت ضفته ولا ضيفك , ولك علي اللي تطلبه جاك وإن بغيت هاللحين اقط لك روس الثنين قدامك اللي تردوا بك (يقصد الراعي والصبي وهم من مواليه ) وإن بغيت خذهم تراهم جوك عطية , قلت لابالله ياطويل العمر مالي برجالك غرض , أنا مثل ماسمعت عني رجل خلوي ومعيشتي أنا وعيالي على الله ثم على الصيد وماعطاني الله كود هذا ( يغط على لسانه ) وهذا ما قلت :

يقول الخلاوي والخلاوي راشــد = بالقيل غالي مثل غالي الجلايـب
يـا مـدى يـم النـشــا مـا نـصيـحـه = من حاضرٍ منهم ومن كان غايب
من لا يحصـّل بأول العمر طولـه = فهو عاجز عنها إلى صار شايب
ومن خاب في اول صباه من الثنا = فهو لازم في تالي العمر خـايـب
كما مورد ظاميه والقيـظ قد صفا = على بارد الثريّـا هبيـل النشـايـب
ياعيال سيروا يم الربيعي محمد = فهو زبـن من تعنّى له الركـايــب
ابو كلمـة وإن قالـها مـا تغيّـرت = كنك على ما قال بالخمس قاضـب
أجي له ويعطيني عطــايا كثيرة = ولـيس لمن لا يعطي الله راغــب
صخا لي بنمر جروة حضرميـة = شمـالي نابيـها من الـدم خـاضـب
ترى ثوب راعيها اقدود وحبلها = رثيت القوىمن طول ماهىتجاذب
إلى علّق القنّاص راسين علقـت = خمسـة تخاميـس اعـداد الحـاسـب
كن اقرون الصيد من حول بيت = هشيـم الغضـا ادنـاه للنـار حـاطب
يا ليت منيع فارس الخيل باللقـا= على جازع البطحا يمين المشاعب
يشوفون ذي مع ذي وهذيك عند ذي = كما الودع دانا بينـهم نظم كـاعب
وبـقيـت كني حـاومي لـي مـديـنـه = عليها الدول فوق الدروب الديادب

وسميت طلبتي منه بالأبيات وهي مقصدي ...الفهده , ويوم سمع الأمير الربيعي الأبيات وهو قبل وعدني باللي اطلبه , وخاف من سلطة لساني , وكز الفهده يمي وهي غاليةٍ عنده باللحيل وماخطر باله يوم أنها تروح منه بالسهوله هاذي , واجيك من عنده والفهده تبرى لي يم عرب خويي منيع بن سالم , يومني جيته قلت : هي هاذي هي اللي ما جبتها قبلي , قال منيع : لابالله يالخلاوي هاذي هي وألينك كسبت التحدي وغلبتني بها , وثاني نهار وأجيبها ناكسها للأمير محمد الربيعي يومنه شافها وشافني وهو يتهول , وماخطرت باله أنها يشوفها مرة ثانية , قال : ليه رجعت بها , قلت : ياطويل العمر أنا اكثر منها صيد ولا حبيت اعطيها غيرك وهي ماهي هي المقصد , واعلمه بسالفة التحدي اللي بيني وبين منيع بن سالم , قال الأمير محمد الربيعي : لابالله عرفناك زودٍ على عرفنا لك ......................))

محبكم : [[ اخوصيته ]]

02-28-2009, 07:41 PM

أيها العملاق الشامخ أخو صيته

شكراً بحجم هذه الجواهر والأحجار الكريمه التي طرزت بها متصفحك

متابعين بشوق

03-02-2009, 01:25 AM

[[ الجــــــــــــــــــــــادة ]]

سلسلة ................قصصية

في حلقات ........منفصلة

سلسلة ........تبحث في قصص.......وأمجاد الأباء والأجداد .....لا نتحدث فيها
بل يتحدث فيها رواتها.............عن أنفسهم

الحلقة : [[الحادي عشـ( 11)ـــــــــــــــرة ]]

(( من هالسنين أيام ثورة عبدالكريم قاسم ريس العراق على الكويت , طلبت حكومة الكويت الكتب بالجيش لعيال الحمايل من كل بد , ومثلي مثل عيال عنزة عموم سجلت بالجيش مع هاللي كتبوا عسكر بالجيش , وعبدالكريم قاسم نسمع حسه بس يخطب بالرادو ومن قوة وحيه اللي يورى لنا أنه يظهر علينا معه , وسمعنا أنه يحشد قواته العراقية على الحدود مع الكويت , الزبدة أني مع خويانا بلنا خيمة بهالدبدبة وكل اللي معي بالخبرة من عيال نجد بس أنا اللي شمالي وعنزي , وريسنا الأمر مطيري وقاعدين نتعلل قدام الخيمة وهو يقول : يالربع من هي أكبر القبايل , رد عليه واحد من خويانا من بني حرب أكبر القبايل معروفة قبيلة عنزة , قال المطيري أجل اسمعوا الليلة نبي كل واحد منكم يعد أقشر ماجرى عليه بالديرة هاذي , وكلكم ما انتم من اهلها , كل واحد بكم قرط عصا حلال اهله وجايدور الكتب هنيا .
وأكيد نبدأ من عند الكبير بنا والكبير الله ولا بنا خطمة على ابن وايل ,( يقصدني بالحكي ) قلت : ماعليك زود يابو فلان انت ومن يسمع وانا ابن وايل ( محيسن بن هيشان من الصقور من عنزة ) لابالله ألينا غير نعده اللي صار , وأبرك على ركبي وجهي يم جهة ريسنا المطيري وباقي العسكر عيونهم لي , هذا ياوجيه الخير بحدى هالأيام وأنا بحدى شوارع الديرة واقف اتحرى وقفة السيد عشان اقطع الطريق للجهة المقابلة يوم اللي همز كتفي وألتفت له يومنها هاك المرآة اللي معها لها عيل بلفافته بين أيديها وقالت لي : أبيك ياوجه الخير تساعدني بشيل هالعيل عني ياما اقطع الطريق مابي شدة على الركض مع الطريق وهي معي اخاف اطيح به بوسط الشارع , وانا لك اخاذه منها واقطع به الطريق والنية انها هي بثري يوم وصلت مقطاع الشارع وابحر لمكانها يوم ماهي به , واتلفت واتشوفها يوم بس مكانها ما ادري وين لقت .
دريت أنها دجلة بي ورطتني بالعيل , وانا لك ابلش بحالي مدري وش السواة وهي تضيق علي هالوسيعة بكبرها واخذ لي شوين وأنا مكاني وعيلي بيديه ورجليه متسمرات بالأرض من هول المصيبة , ويوم الله هداني ومشيت واشوف هاك المسجد قدامي قلت لحالي جت وجابها الله احطه بالمسجد وافتك من شره , وأتشوف هو حولي احد يشوفني يوم ماحولي احد وأدخلك المسجد أبي أركد العيل وانحاش يوم حطيته بالأرض يوم هذا الصوت من حدى زواياه , يصوت لي : هاه هذا الأنت اللي يجيب من الوغدان للمسجد , الله كشف سترك أيا لظالم , يوم جاني هاك الشايب اللي معه هاك الباكورة وهو رجل شديد وجبر , جاء هادن علي , قلت له ياحجي استر علّي ياوجه الخير , قال اسمع أبي استر عليك بشرط تاخذ عيلك معك قلت خير خير , واقفي من عنده قال هاه وين رايح تعال تعال , خذ هذا اللي جبته اليوم قبل الفجر وإلا نستيه بعد , قلت لابالله كملت صاروا بدل العيل اثنين , واروح يمه واشيله مع اخوه اللي قبل معّي – خلاص صاروا اخوان وانا ابوهم الشكوى لله – واطلع من المسجد دخلته بواحد وطلعت بأثنين , وكلت أمري بالله واخذتهم وقلت لحالي ياولد وش السواة ياولد , قلت مالي إلا أني أوديهم للحضانة وأسلمهم هناك وأقول أن أمهم ماتت وهي تضنى بهم , ومالي احد بالديرة أخليهم عنده , وانأ رجل عسكري بالجيش .
ورحت يم الحضانة وسويت اللي طرى بالي وطلبوا مني بطاقة إثبات شخصية واطلعها لهم وأخذوهم مني وسجلوهم باسمي وقلت لحالي كله واحد المهم السلامة منهم والاسم بعد ماهو اسمي الصحيح ولا الجد الجد – بالكويت الناس تقلب اسماها – والله يفكني من هالبلوى اللي بليت بها , وهو يسألني عاد ريسنا المطيري : عاد هو انت تزورهم , قلت وليه ما أزورهم ماهم عيالي , وهو يقومون الربع لهم ضحك , قال خوينا الحربي لابالله يابن وايل : ألين هاذي هي اقشر شين سمعت به بحياتي ................))

03-02-2009, 01:37 AM

[[ الجــــــــــــــــــــــادة ]]

سلسلة ................قصصية

في حلقات ........منفصلة

سلسلة ........تبحث في قصص.......وأمجاد الأباء والأجداد .....لا نتحدث فيها
بل يتحدث فيها رواتها.[]............عن أنفسهم

الحلقة : [[ الثانية عشـ((12 ))ـــــــــــــــرة ]]

• الزمان -1385/1965
• المكان – المنطقة الشرقية
• بطل الرواية – فلاح الحبلاني العنزي
• تدور احداث القصة أيام شركة التوبلين .

(( قال فلاح ..... شالونا بالطيارة من الظهران وما وقعت بنا غير جنوب الهفوف بلنا ارض ماحولنا شين غير خويمات مبنية لعمال الشركة , والطيارة هاذي تجي وتروح كل عشرة أيام بس تاخذ وتودي أوادم وأرزاق وبعض الحاجات والمعدات اللي يحتاجونها , أنا توني عامل جديد بها ودوني للمكان هذا ويوم حولت بنا الطيارة وبس أنا اللي بها من عمال والباقين يرجعون بها , وهو ينطحنا هاك الرجال الأشقر الطويل اللي يباريه له كلب مرة يصير على يمناه ومرة على يساره وبعض النوبات يجي بين رجليه , وأنا من كثر ماني منداش من الطيارة الماخوذه أول مرة أركبها , نسيت اللي أنا به وراح بالي لهالكلب اللي ذكرني بكلاب عربنا والرعيان والبدواة والشمال وهاك الوديان والتلاع , وأنا وين هاللحين وهي وين , ومافطنت غير أنه قدامي الهلف الأمريكاني الأشقر , وهو يمد يده لي ويصافحني وقال : أهلين إيريبيا , قلت أعلين وسهلين بك , يوم مهع هاك الولد المربوع وهو يقول لي هذا هو الريس هنيا وحنا كلنا خوياه وأنايازلمة مساعده والمترجم له ومن لهجته عرفت أنه فلسطيني , قالي أهلين وسهلين أخ فلاح , مو هذا أسمك ؟؟ قلت أي بالله , قال خبرونا به جماعة الطيارة , وحنا ناصل حدى الخيام , وندخل بها وهو يوريني مكاني وقال لك فلاح حط عفشك هون وهيهم زملاتك هسا بيجو هون , هم هسا بالشغل وأنت أرتاح اليوم وبالمساء بنشوفك , وهو لك يروح من عندي , ومثل ماقال يومنه جاء المساء ياهم جايين العمال اللي مثلي ياهم أحدا عش رجال , ,اسلم لك عليهم واتعرف عليهم وكلهم من عيال الحمايل سعوديين .
الزبدة قالوا بالليل يجتمع بنا الريس قبل ماينام كل ليلة من شان يعلمنا وش نسوي باكر من شغل وين نروح , وتره مايرحم ولا ياوي ويسجل الملاحظات على كل واحد منا وما يفطن غير هو مفنش ( مفصول ) تره شديد بالشغل ومايرحم اللي يخطي وإلا يكسر أو يخرب منه شين من المعدات قلت يصير خير إن شاء الله . يومنه جاء الليل وعقب ماسووا الربع عشاهم و تعشينا , وحنا نروح يم خيمة الريس الأمريكاني ياهو جالس له على كرسي وحاطه بين رجليه بباب الخيمه وخويانا وهم يجلسون بوسطها وأنا صرت الطرفاني منهم من ورى , وقتنا هالليالي تالي برد , والريس له حكي علينا والفلسطيني يترجم لنا ومافيه غير ضويو قاصرن عليه يالله نشوف وجيه بعضنا , وهو يحكي علينا والكليب الماخوذ يعرف كل خواينا وجاسرن عليهم ومعودينه على هالطبع , يتنشنشهم واحد واحد ويقمز عليهم وهم مايقولون له شين ويومنه وصلني ويبي يسوي بي مثلهم , وصار لك ورى ظهري وأنا بهالكوع أنجره ياغادن له عواء ومن أمس مثل الفشقه الماخوذ ياهو عند راعيه وبحضنه , وهو يخرب الأجتماع الشغل وصار الأمريكاني له لعبطه وزبده ويخابط برجله وله شتايم ما أعرفها وقام يرطن على الفلسطيني اللي يغط علي وهو يحاول يهديه وما نفع به , وهو يشر بيده المساعد : خلاص يارجال روحوا كلن على خيمته , ونروح بعضهم اللي يضحك وجازة له سواتي وبعضهم اللي زعل مني وقال : أنت ياولد اليوم توك واصل وأكيد هذا الريس زعل منك وغير يفصلك أو أنه يبهذلك بالشغل , منشان انك ضربت كلبه , هذا الكلب له سنين وحنا صابرين عليه وعلى راعيه منشان لقمة المعوشة , قال حديهم يالربع الأمر صار وقضى , وشوين ياهذا المساعد الفلسطيني جايك لخيمتنا , قال : يا أخ فلاح لازم يازلمة بتروح للريس وتتسامح منه مومعقول هسا واصل وبكره بيرجع على أول طيارة تصل , وهم يلجون علي الربع كلهم وأطيع شورهم ونجيك يم خيمة الريس الأمريكاني , ياهو موقد له نويره عند باب الخيمة وحاطن كرسيه ويعمر ويتقهوا من قهوتهم , والكليب رابضن عنده يوم أقبلنا عليه وهو على طول يفز على طوله ويغط علي بيده (( يو فنش – يو أرستاند )) ويوقم ابن الحلال الفلسطيني يحاول به ياهو يعمعم ماهو رادن عليه والكليب الماخوذ وهو يجي يمي وأبعده برجلي ياهو باغيني وهو يتكلم علي وقام يرطن برطن حسيت أنه ماهو زين أبد هقيت أنه يسب ويشتم , قلت لأبن الحلال المساعد الفلسطيني , ياراجال خله على كيفه الرزق على الله ماهو عليه , ياهو ماهو رادن عليه أبد , قلت قله وأنا بعد مضرب عن العمل هذا مثل طلبه ( إندبلت كبدي عليه ) وأنا ألقط الكليب وأحذفه بالنار وهي لها وعوعورة , وهو يصدر بوجهه خلا والأمريكاني يتبعه بهالليل له دبكة وراه وأنا رجعت للخيمة وبعض خواينا فزعوا مع الريس يدورون معه كلبه , وحنا ننام ويوم أصبحنا وقعدوا خويانا اللي معي بالخيمة وهو واحد منهم يروح لخيمة الريس يامار الريس ماهي من عوايده توه ماقام من فراشه والكليب الماخوذ عنده شكله ألوان ألوان , والريس له شخير, وهو ينكس لنا وقال والله يالربع هلون وهلون وحنا مانقدر نطلع الشغل من دونه والشغل بعيد من مكانا هذا اللي حنا به , وهاك اليوم يقطع على رايه الريس وناخذ أستراحه قال بعض خويانا هاذي أول مرة تصير من سبع سنين , الأمريكان ما يعطلون أبد .
وأنا هاللحين دريت أني مفصول مفصول مابها حكي , بس أنهم لازم ينتظرون الطيارة اللي جابتني ترجعني ويوم جتنا , وهو يعطي قايدها هاك الورقه وأنا أركب الطيارة وننكس للظهران وقالوا لازم تقابل الريس هنيا أنت معك تحقيق , يومن اللجنة بعضهم عرب ومابهم كود سعودي واحد , قلتله السالفة كلها من أولها لأخرها ويومنه يقوم يتبسم أبن الحلال : بالله رميت كلبه بالنار , ألينك رجال ماعليك أنت لازم تنفصل من عملك هذا , بس الأرزاق على الله , وفيه عمل ثاني ممكن تلقى به مصدر رزق أخير ...ومثل ماقال وأترك الشركة وأشتغل بلي شغلة ثانية ....................))

03-09-2009, 12:31 AM

[[ الجــــــــــــــــــــــادة ]]

سلسلة ................قصصية

في حلقات ........منفصلة

سلسلة ........تبحث في قصص.......وأمجاد الأباء والأجداد .....لا نتحدث فيها
بل يتحدث فيها رواتها.............عن أنفسهم

الحلقة : [[ الثالثـــــة عشـ((13 ))ــــــــــرة ]]

قال الراوي .....(( من هالسنين فيه بنت عنزية من عرب المحينات من الدهامشة من العمارات , تربت يتيمة الأم عند مرة أبوها , ويومنها كبرت شوين وغدت بنت صارت تسرح بالزمل, ولها مرة أبو قشرا عليها وماتاوي لها أبد , مبغضتها من كثر مايمدح رجلها أمها قدامها ويعدد مثيلها ويتوجد عليها من غلاه لها, عاد مرة أبوها من غيرتها من جارتها وهي ميته صبت بغضها على بنتها وهي حيه , وقامت تدور اللي يغث البنية وتسويه لها , ومن سوايها بها تعيي عليها وماتعطيها عقل للزمل تهجره منشان بها, وياعطتها ياهن نكث بساع ينقطعن , وهذا هي (صالحة ) بنت الحلال كل ليلها ونهارها بس تردد الزمل ياسرحت بهالفلاة , وما تروح غير رايح أول الليل , وبحدى هالأيام وهي مع زمل أبوها بلها شعيب من شعبان هالحماد وزملها مستفلي وماحولها أحد وهي تقوم تهيجن :

ياشين ماتويق يادبي = على المحينات لك نوبة
الزمل هييجك عذبي = هييج والهجر عيوبه
خل المخابيط تشتبي = والجيش والخيل له شوبه

تنخى واحدٍ يقال له: دبي النجباني من التومان من شمر , من فريسهم المشهورين وعقيد ربعه محضض , وكل ماهذا يغير على قبايل عنزة وياخذ حلالهم , والبنيه يقال لها ( صالحة ) ومن كثر ماهي متلعوزة من فعايل مرة أبوها بها , ولا تبي تكدر خاطر أبوها وتشكيله من سوايا مرته , وانهد حيلها من تقلب الزمل وتردده كل يوم قالت اللي قالت .
ويجيب الله لها دبي غزاي وهو واللي معه ومادريت عنه مكمن بله راس جذيبه عند له رجم وسمعها وهي تهيجن وعرف وصايفها وشاف جملها مع الزمل وتبخصه من الدلال اللي عليه , وهو من مكانه ينكس لخوياه اللي بلهم عرجة شعيب ما ينشافون, ويومنه وصل ربعه قال نبي هالمرة نغزي عرب المحينات من عنزه.
وصالحة يومنها روحت مثل العادة عقب عقب العشاء يوم أهلها ماهم حاسينها بعشا مثل العادة الولية مرة أبو ومامن محبة ولاطافه لها, وتقوم المسكينه وتركب طاستها وتسوي لها عشى , ولها صحيبةٍ بسنها من العمر , وقصيرةٍ لها ويوم شافت النار بيت أبو صالحة دريت أنها مروحة , وهي تجيك يمها تدور التعلله ,وصالحة من كثر ماهي متضايقة من عيشتها عند مرة أبوها ومالها لا أخت ولا خاله , ماغير بنت قصراها اللي هي صحيبتها الروح بالروح , وكل علومها تقولها لها , وهي تسولف لها اللي صار معها اليوم وتعلمها أنها قالت لها بيوتات وتنخى العقيد دبي أن الله يجيبه لعربها غزاي وياخذ كل الحلال ويريحها من شقاها اللي مامنه راحة أبد ومرة أبوها عايشة.
والفجر قبل طلوع الضو وهم يحلون الغزو بالعرب , ياهم دبي وربعه لهم حدى على ظهور خيلهم وبس تسمع طاري دبي ويقفون لك بالحلال كله .
وصار اللي صار بالعرب , وهي تعلم البنية صحيبة صالحة أمها باللي قالت لها صالحة البارح وأنها نخت دبي أنه يجي وياخذ حلال العرب كله ومعه زمل أبوها ويفكها من السروح , وبساع وهي تروح أمها مرة قصيرهم وتعلملك مرة أبو صالحة بسالفة صالحة وقصايدها بدبي الشمري , ومرة الأبو ماصدقت تلقى زلة على صالحة وهي لك تعلم عليها أبوها وأنها هي اللي دلت العقيد دبي وربعه بالعرب وأنها باغيته وهويانةٍ عليه , وهي يوم سألها ابوها حلفت له أنها لاشافته ولا شافها ولا تعرفه ولا يعرفها,وماصدقها أبوها,وقام عليهاالمسكينه وفدغها وشين فالها , وانتشرت سالفت صالحة المحينية والعقيد دبي بين العربان , وهي تاصل لك دبي النجباني التوماني الشمري , وهو يرسل هاك المرسول يم أبوها قال لا بالله ألينها العرية البرية , أنا اللي بهذاك النهار مكمن بالمكان الفلاني وشفتها وهي سراحةٍ بالزمل والمارية على حكيي هذا أن جملها أوضح وبه له دلال هلون وهلون ( عد وصايف الدلال ) ولا دريت عني بنت الأجواد وسمعتها تهيجن ونختني وجيت على النخوة , وإلا هي :

ياصالحه يام دواره = عين الغزيل ليا سجي
مانتي من البيض مكاره = اصدق من اللي نهج حجي
يابطن حمرا مع الغاره = حواية البوش لاهجي

[[ محبكم : اخوصيته ]]

03-09-2009, 12:54 AM

[[ الجــــــــــــــــــــــادة ]]

سلسلة ................قصصية

في حلقات ........منفصلة

سلسلة ........تبحث في قصص.......وأمجاد الأباء والأجداد .....لا نتحدث فيها
بل يتحدث فيها رواتها.............عن أنفسهم
الحلقة : [[ الرابعـــة عشـ( 14 )ــــــــــرة ]]

قال الراوي........(( مويضي البرازيه من قبيلة مطير وأخذت لها من بني عمها رجل فارس من كبار ربعه , وصار ما يقعد عندها طول وقته غزاي ويأخذ له أيام ياغزى , ويا رجع لبيته لفوه ربعه وبس بربعته ودايم عنده ضيوف وما يجي لها كود للمنام , وياأصبح صار بلشان باللي يجري على العرب ياجى من هذا راح بسالفة مع هذا , وما قدرت زوجته مويضي تحمل طبايعه وملت منها ومن سواياه , وبحدى الأيام سمعها تقصد وتسمعه :

وش عاد لو حطيت فتخة وباكور = مع جوخة(ن) تكسي قطاة العبيه
لغير أقطك كنه الشري ممرور= وياطاب مقلوعك فعود عليه

ويومنه سمع منها اللي سمع وهو يطلقها , وعقبه وهي ترسل مويضي على لها راع من الرعيان منشان يخطبها وهو يتزوجها , ومن كثر فرحته بها ماهو مصدق أنها صارة حليلة(ن) له , وبس وده يرضيها باللي تطلبه منه , ولقت عنده اللي قبل فاقدته عند رجلها الأول , وجوازها من الراعي عقب ماهي مرة واحد من كبار ربعه أزعل عليها ناس من العرب , وبحدى الأيام وهن يجنها حريم بيتها مسيرات عليها ووحدة(ن) منهن قالت لها :

شوقي غلب شوقك على هبة الريح = ومحصل(ن) فخر الكرم والشجاعة
وركاب شوقي كل يوم(ن) مشاويح = وأليا لفا صكوا عليه الجماعة
يالبيض شومن للرجال المفاليح = لا تقربن راع الردى والدناعة

قالت لها مويضي كل اللي قلتيه ماهوب غايب(ن) عني ولا خافيني منه شين , بس أنا لي هدف من أخذتي لراعي من رعيان العرب وهذا هو هدفي :

نفسي تمنيني رجال الشجاعة = ودي بهم مير المناعير صلفين
خذيت لي دس(ن) بوسط الجماعة= يرعى غنمهم والبهم والبعارين
وأليا نزرته صار قلبه رعاعه = يقول ياهاف الحشا ويش تبغين
أن قلت له هات الحطب قال طاعة = وعجل بتحضير الصحن والمواعين
لو أضربه وأشد أنا في كراعه = لاهوب شاكيني ولا الناس دارين

قالن لها الحريم أيه ثري هذا هو هدفك من هالجيزة , هذا هو حقك من الرجال , قالت أيه نعم هذا هو رجل مويضي اللي أنا أبيه , وصار الرجل مايقاله بالعرب غير رجل مويضي وراح أسمه الصحيح , ولا صار بعد مثل عند كل الناس اللي يلقى من هالعينه يقال له "" رجل مويضي "" ................))

03-23-2009, 10:38 PM

سلسلة ................قصصية في حلقات ........منفصلة

سلسلة ........تبحث في قصص.......وأمجاد الأباء والأجداد .....لا نتحدث فيها
بل يتحدث فيها رواتها.............عن أنفسهم

الحلقة : [[ الرابعــــــــــة عشـ(( 14 ))ــــــــــرة ]]

بطل هذه الحلقة :: جيعفرالصخري ـــ من قبيلة بني صخر هذه الرواية كتبت باللغة العربية الفصحى . واعدت صياغتها باللهجة العامية !! كما هو متبع في طرحي للكتابة في هذه السلسلة ..

ويقول فيها المؤلف (( هذه السالفة حكاها عليّ الشيخ : دوخي بن سمير شيخ قبيلة ولد علي وانا ظيف عنده بيته .. ويقول أنها صارت لواحد(ن) من عربه .. وهي ان واحد(ن) من عربهم يقال له جبل .. وجبل هذا عنده له فرس اصيل من اصايل الخيل ولا مثلها بعربنا .. تلحق ولا تنلحق , وصار صيتها عند بادية حوران كلها ياما وصل صيتها الشام !!!. وهو يسمع بها حدا الوزرى هناك ويقال له : اسعد باشا من بيت العظم ... وهو يرسل الوزير اسعد باشا على جبل مرسول عشان يشري الفرس منه ؟؟. ومعه له كيس نيرات ذهب لراعيها .. ورفض جبل انه يبيع فرسه على الوزير !!!. وقال لمرسوله : قل للوزير اسعد باشا البدوي مايبيع فرسه ؟؟!! واللي يبيع فرسه مثل اللي يفرط بشرفه!!. والشرف ما ينباع .. ويومنه نكس المرسال للوزير اسعد باشا وعلمه باللي قاله راع الفرس ؟!. كبرت الفرس براس الوزير وأكد أنها لازم يشريها بأي ثمن !! ولازم يحصل عليها وبأي طريقة مع أنه قادر على انه ياخذها غصب على راعيها ؟؟!!. عشان ما يشوه سمعته عند الباشوات وعند والوالي بالشام .. وصارت قصة فرس جبل اللي من ولد علي والوزير اسعد باشا على ألسان الناس بكل مكان !!. وخلا هذا الوزير يصمم على الفرس ولكنه ما قدر يحصل عليها !!. وجبل راعيها بعد صارت فرسه هي الشغل الشاغل له بليله ونهاره وحتى انه بعدبعض عربه يحرسونها معه .. ويومنه ما قدر الوزير انه ياخذها لا بالفوس ولا بالناموس .. اخذله مدة اشهر ما يحب طاريها !!. وجبل بعدما تطمن أكثر ان الوزير بطل يطلبها . وحدا الأيام الضحى والوزير جالس بقصره ويوم وقف باب بقصره هاك الرجال البدوي القصير بالحيل ويحكي مع حراس القصر : ما هذا قصر الوزير اسعد باشا يالربع ؟؟. قال الحارس : ايه هو . شو بدك منه؟؟ قال يا الأخو انت بس قله انا جايه عشان موضوع فرس جبل اللي بحوران !!!. والوزير يشوف الرجال يحكي مع الحارس وهو يصوت للحارس : انت ياولد منهو هيدا اللي عم بتحكي معه ؟؟ قال الحارس : سيدي هذا الزلمه يقول جاي منشان موضوع الفرس ؟؟. وهو يصوت له الوزير : تعال نشوف شنو عندك ؟؟ قال البدوي : سيدي انا اسمي جيعفر الصخري من قبيلة بني صخر . قال الوزير : وبعدين : وانا سيدي جاي عشان اجيب لك فرس جبل البدوي اللي بديرة حوران ... قال الوزير : شو شو..!! لا عمى عليك !! لك انت !! انت نص نصيص . شقفة رجال !! ولك انا ما قدرت عليها ؟؟ انت بتقدر !!؟ قال جعيفر : سيدي الرجال مخابر ماهي مظاهر !!. قال الوزير : لك ايه بتحكي الصحيح يا أبني ؟!. وشو بدك ؟ قال جيعفر ياسيدي انت شو بتعطيني ؟؟ قال الوزير لك عليقتها ذهب .. بتسمع يابدوي ؟!!. قال جيعفر خلاص سيدي وانا ان شاء الله بجيبها لك .. وترخص من الوزير ومشى علا طول لديرتنا . ويوم وصل المضارب وهو علا طول بوجهه لبيت جبل وهو يشوف الفرس قدام البيت ويناظر لها زين من بعيد للبعيد ويتفحص مكان البيت من بين بيوت عرب ولد علي !!. ويوم توكد من مكان البيت وحدده زين ويروح يم له غار ماهو بعيد متطرف عن المنازل وهو يحط راسه وينام به كل النهار ياما انتصف الليل , ويجي يتسحب على روس رجليه شوي شوي يم العرب وبوجهه يم جهة بيت جبل وفرسه .. ويلقى أهل البيت نايمين والفرس محدده ورابطها بلها جنزير طويل وهو يمشي معه يقصه يامل وصل وسط البيت .. وعرف ان راسه مدقوق بله وتد والوتد عليه فراش جبل وزوجته ؟؟!!. يعني ماله حيلة عليه يشلعه أو يجره !!. ويروح جيعفر يم الفرس وهو يرمي كل ثيابه ( عريان ) عندها ويجيك يتسحب يم جهة جبل وزوجته وهو يدخل مع قاعة الفراش من ورى ويصير بينهم ( جسمه صخيف ) وياخذ يتلزز بينهم مرة يلز لجبل ويبعد عنه يحسبه مرته !! ومرة يلز للمرآة وتبعد عنه تحسبه زوجها يتقلب بفراشه ؟؟!!. وهذا هو يتلمس بيديه ويتحصص الفراش يدور مكان الوتد ياما لقاه .. ياهو معرطٍ على له شبريه بفمه ويقور(شق) الفراش بها واخذ يخلخل الوتد شوي شوي ياما شلعه ؟؟!!. وهو ياخذه ويحطه بين رجليه وينكس على قفاه من الفراش .. وعلا طول يروح للفرس ويفك حديدها ويلبس هدومه وياخذ له رمح(ن) مركوز عند راس راع البيت (جبل ) .. ويركب الفرس ويجيك يم فراشهم وهو على ظهرها وبيده الرمح .. ويلكز به جبل وهو بفراشه : ياجبل ياجبل ياجبل ... وهو يرفع راسه جبل من تحت الغطا وعلى عيونه النوم .. اسمع انا جيعفر الصخري !!. وجيتك وباخذ فرسك ؟؟!! وتعرف وين أوديها !! للوزير اسعد باشا اللي شرطلي بها ملئ عليقتها نيرات ذهب !! وأنا استاهل شرطها ؟؟. ولا تقول اني غدرت بك وما علمتك وبقتها منك هاك تسمع .. وهو ينطلق عليها مثل السهم من عنده .. وجبل وهو يقوم من فراشه مثل المجنون ما عليه هدوم !!. ويصيح بالعرب تالي الليل له تصاويت ينخاهم ويتويل على فرسه اللي راحت عليه ... وين النشاما وين أهل الخيل ؟؟ ويتجمعون عليه بسرعة وهم يركبون بطلب الفرس والصخري اللي أخذها من وسط بيوتهم ؟؟!!. وهي تركب فرسان ولد علي يطاردونه بهالليل الأبهم . وجبل راكب(ن) فرس لأخوه أخت(ن) لفرسه بس ماهي مثل شهرتها وسمعت فرسه عند العربان !!. وتصير المطارده بين جعيفر وفرسان ولد علي وما يبقى من الخيالة وراه كود ثلاثة ورابعهم جبل على فرس اخوه وهو أقربهم له .. ويومنه صار قريب له بالحيل وغدى راس فرسه عند ذيل الفرس اللي عليها جعيفر والخيالة الباقين ما هم حولهم بعيدين شوي وبهالحكي هالحين شفق ضو الصبح ويشوفون الأزوال هذيك هي قدامهم وهذا جبل حول فرسه اللي عليها الصخري .. وهو يقوم جبل له تصاويت لجيعفر "" ياجعيفر ياجعيفر كع لجامها واقرص اذنها اليمنى وإلكدها برجليك بالحيل ترها تغدي بك وتروح ولا يلحقك منا احد ابد "" وهو يسوي جعيفر مثل ما قاله جبل راع الفرس .. يومنها انطلقت به تقل شيهانة قدامهم وتقطع بها الشوف دونهم ... وهم يلحقون الخيالة الثلاثة خويا جبل من فريس ولد علي وسمعوا جبل يومنه يصوت لراع الفرس وعقب ما قاله الحكي اللي ما سمعوه شافوا وشلون الفرس غدت تقل شيهانه .. قالوا وش بلاك يارجل وش جاك وش اللي قلته للي اخذ منك فرسك ؟؟ من قلت الحكي اللي ما سمعناه وانت قبل عنده تخطفه بيدك وهي تنطلق به تقل طير طاير .. انت اللي خليته يغدي بها اليوم لو ما قلت اللي قلت كان منكسينها معنا هالحين ؟؟!!. قال جبل انا أشهد ان هالصخري يستاهل شرطها !!. وانا أحسن ما عندي تروح عليّ ولا يقال أنه فيه من خيل ولد علي اللي لحقها ..( واللي قال جبل لجيعفر هذا يسمونه سر الفرس .. ماحد يعرفه غير راعيها يعودها عليه وبساعة المعركة يقوله لها ..) وجبل وخوياه ينكسون للعرب .. والبطل جيعفر طب الشام وجاب الفرس للوزير اسعدباشا وعطاه اللي وعده به ))....

على درب الجــــــادة نلتقي لنرتقي

أدوات الموضوع	إبحث في الموضوع
مشاهدة صفحة طباعة الموضوع أرسل هذا الموضوع إلى صديق	إبحث في الموضوع: البحث المتقدم
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الإهداءات