الجــــــــــــــــــــــــا د ة - الصفحة 2

12-19-2008, 03:20 AM

:::

[[ الجــــــــــــا دة ]]
سلسلة جديدة
في حلقات ..............تبحث في قصص وأمجاد الأباء والأجداد

سلسلة لا نتحدث فيها
بل يتحدث فيها رواتها .................عن أنفسهم
وهذه الحلقة : الأولـــ(1)ـى
(( هّربت وأبناخيلي من الرويشد بسنة 93 هـ , ويومنا مشينا بهالليل وهم يطلعون لنا الدورية حدى دوريات الأردن وهم يوقفونا واللي معنا تجرة دخان وسيارتنا حصنية , وهم ياخذونا يم المفرق ويحطونا بالسجن أنا وخويي , يومنا فتناه يابه له خمسة عيال وكلهم روله من رجال الشيخ النوري بن فواز الشعلان الله يحفظه , ماسكينهم البارح لأنهم صار عليهم حادث أنقلبت بهم سيارتهم وتوفى عليهم خويهم عليه رحمة الله وهم بليل ويومنهم أصبحوا وهم يدفنونه بطلعة الدورية عليهم وجابوهم من الرويشد لسجن المفرق , وهاك الليلة نمرح بالسجن معهم والصبح يومنه جاك هاك الوليده اللي دخل بسيارته تكسي أزرق , وهو يقولي حدى العيال الروله ترى هذا هو الشيخ النوري بن فواز بن شعلان , وهو جاي بقضيتنا أكيد أنت أحك معه بقضيتك تراه طير شلوى يفزعلك , يومني بحرت من باب السجن اللي بله برحه ياهذا هو الشيخ النوري واقف مع له ضابط بنجمتين(ملازم ) وعقب شوين وهم يصوتون للعيال الرولة اللي معنا بالسجن وهم يطلعون وعيني لهم ياما طلعوا مع باب السجن , وهذا هو الشيخ النوري متواقف مع الضابط وله حكي عليه , وعقب شوين تركه الضابط ودخل حدى الدور وبقى الشيخ إلحاله , على وقفته بالبرحة اللي قدام سجننا , وأنا أصوت للعسكري الحارس اللي على الباب , وقلت له ياالأخو: أنا بدوي وما أعرف طير الشرب هنيا , أبي أطلع لي شوين بهالبرحة العريضة , وهو يفك لي الباب واظهر وقبلي يم الشيخ والعسكري يمشي وراي يومنه شافني وصلت للشيخ وهو ينكس وعينه لنا ويوم وصلته قلت له : يالنوري أنا كلمتين يخلصني أنت ياطويل العمر أنت ما أنت بس أمير للرولة , أنت أمير الشمال , وهو يلتفت يمي قال من أنت ولدن له قلت أنا ياطويل العمر : محمد بن سالم بن عبدالرحيم المارق , قال الشيخ : أنت ولد عبدالرحيم المارق قلت أيبله , قال جدك عبالرحيم اخو الأمير فواز بن شعلان ونعرفه زين , ومن معك هنيا قلت بناخيلي ياطويل العمر , قال أسمع أنت بكره الساعة ثمان , قلت أنا بكره يحولوني لعمان , قال الشيخ النوري : أنا قدامك بعمان وأنت أعتبر سالفتك خالصة وطالع طالع منيا حتى لو معك ......., والوعد الصبح الساعة ثمان , وهو يمشي وأنا رجعت للسجن ,وهاك الليلة نمت مرتاح وأنام وأقعد أتحرى الصبح يطلع , والصبح وهم يرحلونا من المفرق لدايرة عمان , ويدخلونا السجن اللي بها وهذا أنا أتشوف مع دريشة السجن (توقيف ) لمدخل الدايرة اللي حنا بها اللي هي شرقينا , ويوم هذا تكسي الشيخ النوري بن فواز الأزرق اللي شفته أمس بسجن المفرق يدخل مع البوابة , وقبل الظهر وهم يطلبونا ويدخل عليهم بحدى هالمكاتب أول ماطلبوا خويي وثريه وقع على تعهد أنه مايكررها , ويوم جاء دوري قالوا لي وقع قلت لهم ماأوقع على ورق ما أعرف اللي مكتوب به , أنا بدوي ومن رجال الشيخ النوري بن شعلان وأدري أني طالع طالع من عندكم وتوقيعي لكم بلساني أعاهدكم أني ما أعودها مرة ثانية , قال حدى الضباط يارجل لاتخاف أبد ماهنيا شين يضرك , قلت اللي وراه مثل الشيخ النوري ما يخاف أبد , قال الضابط أيه صحيح موضوعكم أنهاه الشيخ بس هذا مثل ماتعرف لوازم الدواير , قلت يالوجه الفليح اللي عندي قلته لكم أنا رجل بدوي وما أوقع غير بلساني , قال حدى الضباط اللي بالغرفة لاطولها خلهم يطلعون , وأرسل معهم عسكري يوديهم لسيارتهم , قلت يالوجه الفليح مانعرف نسوق بشوارع عمان خله يظهرنا من الديرة , قال ما يخالف العسكري يطلعكم لطريق المفرق , وحنا نجيك سيارتنا ويركبها العسكري ويطلعنا على طريق المفرق ونعطيه أجاره اللي ينكسه لعمان , ونركب سيارتنا ونجيك راجعين لأهلنا ...............))
واللقاء يتجدد..............................بأذن الله
كتبه لكم......................................[[ أخوصيته ]]

12-20-2008, 06:12 PM

الله عليك ياخو صيته وش هالسوالف اللي تشرح القلب
بالله لاتقطع وكمل السوالف لا تخلينا ننتظر
يستاهل التقييمـ بدون نقاش
بالإنتظاااااااااااااااااااااااااااااااااااار

12-21-2008, 12:58 AM

الحلقه : الثانيـــــــــــــــــــــ( 2)ـة

(( جمال باشا هذا يصير القايد العام للجيوش التركية بسوريا , وهاالرجل عرف عند أهل سوريا كلها بالسفاح , والرجل قوي الشخصية له هيبة بالحيل ويابغا الشين سواه وما يفكر بالعواقب بحينها ابد ابد . رجل(ن) مغرور بذاته ومتغطرس ومبطي وهو ناولي على شر ؟.ومثل العام حذرني منه الله يذكره بالخير كبير تجار العقيلات بالشام اللي يقاله محمد ابن ابراهيم الرواف.واللي مسك عقبه تجاره الشام من عقيل يقاله
ابن بسام اللي هو محمد العبدالله البسام من كبار تجار عقيل ( العقيلات ).وصار عوين لجمال باشا باللي يبيه منه ينفذه له !!.
وبحدى هالأيام طلب جمال باشا ابن بسام بقصره وقاله : يابن بسام دبر النوري ؟!!((أمير الرولة الشيخ النوري بن هزاع الشعلان )) ابي اقلعه يم اسطنبول واللي يروح لأسنطبول مايجي بالسلامه !! وهم يتغترون لي الرجال وهم يلقطوني بهاك الليلة الماطره وهم يغمون عيوني ويسدون أذاني وانا مثل هاك الطير المبرقع لا أسمع ولا أشوف اللي حولي ؟ ويركبوني بهاك الكروزه من امهات حصانين حقات الباشوات وعلينا هاك المطر بالحيل لها صب والشوارع كلها مواه .. وثلاث ليال تظهر الشمس وتغيب بي وانا بالكروزه ؟؟! ما قدروا يمشون من المطر ورابع من ليللة يومنها مشت بي وما ادري وين أنا موجه هي شرقت بي وإلا غربت ؟؟!.
وهاك الليلة بطولها يمشون ويوم جا الصبح الضحويه من النهار يوم أن الكروزه وقفت بنا ؟ وهم يفتحون الباب عني وهم يشيلون الغطا اللي على عيوني وياخذون السدايد اللي بأذاني يومني فتحت يانا بهاك الشعيب اللي توه سايل !! اللي ماعمري شفته وجاني حدا العسكر وقال لي : كانك تبي تغسل وجهك ياشيخ مافيه مانع ابد .. وابحر زين لها الأرض اللي حنا بها ؟؟ يومنها ماهي عرفي ابد وما عمري شفتها من مصتي لأصبعي غير هالشوفه !! ومدري وشي من أرض ؟ وهم يوقدون لهم نار ويسوون لهم هاك الريوق وبريق الشاي ويجيبون لي منه . وهاذا انا أتمايز الأشوار بيني وبين حالي واقعد على هاك الرضمات ومتهقوي بحالي بالركض ما هنيا منهم اللي يقدر يلحقني على رجليه ؟!! أما الحصان لا بالله لا بس يومنهم يفكونها من الكروزه يومني أكيد طاب(ن) لي ديرة بس ما أدري وين أوجه ياهربت منهم ؟!.
وهي تطري علي الشهاده بهاك الساعه واتوضأ بالمويه اللي جابوه لي واتقبل القبله واصلي . وقلت لحالي ياولد خل إيمانك بالله قوي واللي عقد روس الحبال يحلها !!.والحمد لله من هاك النهار وإليا هالساعه وانا ما تركت فرض يفرض من فروض الصلاة . وناصل أسطنبول وهاك الحين كبيرها يقال له سامي باشا . ويوم قربنا للديره وهم يغمون عيوني ويسدون أذاني ويوم وصلنا وحولوني بالسجن ياهم بلهم قلعة(ن)من قلاع تركيا وما حولنا المودماني بس هالعسكر اللي يحرسوني وبوسط القلعة أروح واجي على كيفي ويومن فتشت مخابي ثيابي وألقى معي أربعين نيرة عصملي (مجيدية ) ذهب . وأنا انصفهن نصين عشرين وعشرين ؟! وأطرف عشرين واخلي الباقيات بحدا مخابيي التحتا اللي من يم جلدي ؟!! وابحر زين للي حولي وافطن لراع هاك الحمار اللي ما يجينا غير هو ؟! ولا يجي دايم يجي ويروح نوبات ونوبات يجيب ويشيل من هالمكان اللي انا به وما أدري إليا هالحين وين أنا ؟؟.
وانا اصوت له وهو يجي قلت هاه ياولد قال شو بدك ياسيدي ؟ قلت أسمع ياولد!! انت على هواك ؟قال نعم قلت له ولا تشاور أحد؟ قال لا ما أشاور احد ! قلت أجل اسمع اللي اقوله لك زين وعندي غناتك يوم الله أغناك ؟!! واظهر العشرين نيره واعطيهن أياه . وقلت له ابي منك قهوة ولوازمها وفحم اوقد به وكيس دخان من الزين أحسن مافيه . والباقي تره كله لك !!.
وهاه لك عندي بعد مثلهن ؟؟ بس ابيك قبلها تعاهد الله وتعاهدني على اللي اقوله لك هالحين ما يدري به غير انا وانت مخلوق(ن) يخلق ؟؟ قال حاضر . وهو يحلف لي على رقبته يمين عظيم !! قلت اجل اسمع اللي ابي اقولك عليه ؟؟ ابيك تعلمني بالشينه قبل الزينه من اللي توحيه من العلوم قبل لا تجي هنيا ؟؟ وهو يمشي من عندي على هالعلم وياخذ له مدة ويجيب لي كل اللي طلبته منه وزيادة عليه وقال : والله ياشيخ ما سمعت من اللي أبالك شين !! قلت بسيطة ربك يفرجها ان شاء الله وهذا هو كل ما لفى للسجن ما عنده من العلوم شين ؟؟ ويمضن علي وقم الشهرين ويوم بغا يصير الشهر الثالث وبهاك النهار يومن خويي راع الحمير مقبل علي وهو يخطي على غير عادته هالمرة مثل اللي تقل ماوده يجي يمي ؟؟!!
وهو يقول لي والله ياالشيخ النوري انا أبي اعلمك هالمرة مار وش تعطيني قلت اعطيك اللي انا احرز عليه ان شاء الله ؟؟ ولا يخيب طنك ابد ابد !! مار هات اللي عندك من علوم ؟؟ قال اجل سمعت ان سامي باشا يقول باكر الأدنى يبون يجيبون المشنقه ويركبونها عندك هنيا ؟؟ وسامحني يالشيخ على مثل هيك خبريه !! لكن ياطويل العمر هذا العهد اللي بيني وبينك مثل ما انت عارف ؟؟! قلتله وكل الله انت ما قصرت وهذا اللي سمعت . وهو يروح من عندي يومنا قريب المغرب . ويومنا اصبحنا يوم العسكر لهم جوله ماهي من عواديهم حركتهم اليوم متغيره عن العاده ؟؟ واطلع عليهم وابحر لهم يومنهم يركبون بخشبان المشنقه ؟؟! قلت لا بالله وكدت السالفة وصدق معي راع الحمير .. وهو يزيد يقيني بالله تعالى أكثر من قبل . قلت لا بالله ألين هذي المشنقه اللي ياحطوا بها الرجال وعلقوه برقبته يتلولح ياما يموت لا هو قريب للأرض ؟؟.
وهذا انا عيني لها وعيني لهم وهم يصنعون بها قدامي بهاك النهار كله ياما غابت الشمس ولهم طق ؟؟! ويوم اصبح الصبح من ثاني يوم وجاء الظهر.... يومن خويي راع الحمير خلا حماره عند مدخل السجن وجا يركض على حيله ماهي من عوايده هالمرة ؟؟ قال ياشيخ النوري : انا بشيرك وابغي منك البشاره ؟!!! قلت ابشر بها قال : ابي فرس كحيله أصيل من خيلكم يالروله ؟!! قلت وهي لك .....قال ابشر ان سامي باشا قرصه له داب البارح ومات, وعمرك أطول من عمره ياطويل العمر,وانا اتحمد الله اللي فكني من شره وقلت عقبها هالبويتات : ........................................))

انا احمد اللي ذبح سامي= ذبح وصارت لنا خيره
امسيت والموت قدامي = واصبحت بعيد عن الديره

لنا لقاء يتجدد..................معكم بأذن الله
كتبه لكم .....................[[ اخوصيته ]]

12-21-2008, 01:30 AM

الله لايحرمنا منك ولامن جديدك
اخوي // اخو صيته
نحن في انتظار الجاده في نهاية الاسبوع

12-21-2008, 02:42 PM

بالإنتظارأخوصيتهـ لتكملة هذه الرائعه ..
يعطيك الف عافيهـ أخوي ..
م ــــتابـ ع ــــهـ

12-23-2008, 11:28 PM

[[[ الحلقة : الثالثـــ(3 )ـة ]]]

(( من هالسنين يومن رحمة الأمير النوري بن هزاع الشعلان ضيف عند عشيرة الوهيب من الكواكبه , وأمير الرولة هاكللحين أخوه رحمة الشيخ فهد بن هزاع , أخذ النوري عند الوهيب قطعة سنين حول سبع سنين .
وبحدى هاك الأيام تشاورا الشور مع الشيخ النوري أنهم يغزون حدى القبايل اللي قريبة منهم وهي من عدوان الرولة (قوم للرولة ) وهم يقطعون الراي بهالشي , وسار الغزو ويومنهم أقبلوا على العرب ياهم بطن هاك الشعيب والغزو وهم يكمنون دونهم ومالقوا دونهم طرش كل الطرش صاير ورى بيوت العرب , دريوا أنهم منذرين , وهو يعقد النوري وكبار العقدا اللي معه الراي من جديد , وهو يستخير الشيخ النوري ويبطل من الغزووقال للي عنده : يالربع والله أني شاح بفرسان الرولة يذبحون من شان هالماخوذات, يعني البل , وبهالحكي كل الغزو موقفه يتحرون الراي وش يصمل عليه والشيخ النوري واللي معه من عقدا موقفين خيلهم والعرب والطرش من تحتهم بطن الشعيب والجيش كله موقفه , وهذولا هم يتدالون الراي بينهم بعضهم صف مع راي العقيد وبعضهم ضده , وهم بمكانهم وهو يركب يمهم على فرسه حدى فرسان الكواكبه ويقاله سلمان الكومه من الوهيب , ويجيك على ظهرها وتي تي ياما أوقفها عند العقدا , قال هاه يالربع تقل أشوفكم بحلتم يومنكم وصلتم , قاله حدا العقدا الشيخ النوري يبي النكسة وأنا من رايه والله عندنا عيال الرولة أغلى من كل أباعرهم , قاله سلمان هاذا هو رايك وإلا راي الأمير , وهو يروحلك يم النوري ويتواقف معه وقاله: يا بو نواف أنت يومنك عزمت على الغزو وحنا بعربنا على هالعرب اللي هاللحين هذولا هم من تحتك أنت جيت لكسب حلال همّل وإلا تدري أنها معها أهلها , قاله النوري : لابالله أدري أنها معها معها أهلها والله وسبعة أنعام بهم , قاله سلمان الوهيبي : اجل وش خانت هالوقفه هاذي هالحين عقب ماحفت ركابنا وتقطعت حذا خيلنا وهاذا هو الطرش قبالنا نشوفه وننكس عنه , هذا ماهو راي يابو نواف لابالله ماهو راي أبد أبد , وهويخبط بمحجانه القاع يومن العجاج سمك فوق راسه وصار ماينشاف من الغبرة , وهولك يشد عنان فرسه ويقفيبها من عند النوري واللي حوله, ويلوح على ظهرها ومن مكانه ويصلها على العرب تقل طير ماسح , وبهالحكي الكل يشوفه يومنه تواقف هو والنوري , وكل اللي بالجيش قال خلاص النوري عطاه أمر الغارة , ويبطق الجيش وراه على العرب , والشيخ النوري يوم شاف الجيش أطبق وراه قال: ول ألينك ذبحت عيال الرولة , وسلمان طير شلوى وأول خيال ينطحه دون العرب وهو يرميه عن فرسه بالأرض , ويصير الكون ويكسب النوري الغزوة وياخذون الطرش وتقفوه كله , يومنه أنفك الشاري عن البايع , ياهذا هو سلمان يقودله هاك الأصيل المحجله من الكسب ويجيبها هدية للشيخ النوري اللي قاله : لابالله أنت اللي تستاهلها ياحلق الأجرب _( ومن هاك اليوم صار هو نبق لسلمان بن الكومه الوهيبي الكويكبي , وعشان أنه دوم صدرثوبه فاتح وطالع منه شعر صدره ) أنت اللي غصبتني على هالغزوة غصب وإلا أنا مابغيت تروح عيال الرولة منشان ناقة وبعير ...))

لنا لقاء يتجدد.................بأذن الله
كتبه لكم...............[[ اخوصيته ]]

12-24-2008, 01:14 PM

سلمت الايادي

اخوي اخوصيته
[ متابعه بشغف للبقيّهـ]

12-25-2008, 12:31 AM

سلمت أخوي اخوصيتة على هذة السلسلات .. أسلوب رائع ورواية أروع ..

لاهنت وبيض الله وجهك .. وبأتتظار الحلقات القادمة ..

12-25-2008, 03:57 AM

[[[ الحلقة : الخامســـــ( 5 )ــة ]]]

(( من هالسنين رحت أنا وأخويه الكبير و حنا عيال بن هويشل من الفرجة من الرولة , بس حنا الثنين الإخوان كلن على له ذلول , يم جهة العراق نبي نشري لنا أباعر , وكل منا معه خمس وعشرين نيرة ذهب عصملي - مجيدي ) الكل منا داسهن بلهن كيس تحت محزمه اللي تحت ثيابه(الحقو).
وحنا نضيف لنا راعي هاك البيت من شمر من عرب الشيخ الجرباء (من الجربان من شمر-اللي هو الطرفاني من العرب صار دربنا عليه-سلوم العرب إن الظيف مايتعدى البيوت – يعاد هو غريب – أول بيت يناطحه من العرب يظيفه -, الزبده يوم وصلناه ياهو وحيد أمه ولد(ن) توه على طلعته , ماشاء الله عليه حي فاله هاك الولد المذورع اللي زوله تنصبه, وحنا نوخ ركابنا عنده , ويقوم يهلي ويرحب بهم :ياهلا وغلا يالله أنت حيهم ياهلا ومسهلا ,ويقلطنا بالشق (الربعة ) وأمه على طول وهي توقد النار وتركب طاستها تسوي لنا عشاء , من هالتمن (التمن نوع من الأرز لا يوجد سوى بالعراق -عشان إنا جيناهم عقب عقب العصر , وراع البيت عقب ماقلطنا بالشق وهو ياخذ هاك الدقية-وعاء يوضع به الحليب مصنوع من الخشب-اللي يالله يالله ترفعها بيدك وينحر هاك الخلفة اللي مع اباعره اللي من جاها وهي تفهق وهو يملئ منها الدقيه ويجيبها للظيوف-ماعنده قهوة ولامعاميل -ويركدها عندنا وله تهلي وترحب :يالله حيهم يابعد حيي والله ياهلا ومسهلا , ويروح لوسط البيت ويفج خصم هاك العدل اللي بها من عينة هالتمر الطوقاني (تمر العراق ) اللي مامثله ويقلط التمر والحليب وله تعذر من القصور , وله تهلي وترحب ,قاله أخوي : ياولد مامن قصور قال لا بالله عشاكم ومراحكم الليلة هنيا ماأنتم سارين بهالليل وحلف علينا وراح لأشدة الركايب ويرميها عنها ويشد على عقلهن زين .
وهذا حنا قاعدين بالشق وملقين المحرم ظهورهم-وهاذا هو المعزب بس رايح جاي وله تهلي وترحب "" يابعد حيي ياهلا ومسهلا براعين العليا ..يالله أنت حيهم "" عرفنا من منطوقنا ومن الوسم اللي على الركايب ,ونتعشا هاك الليلة ونمرح عنده ويومنا اصبحنا ياهذاك هو معزبنا قاعد(ن) ينهم على البل ويمتح لها بالدلو من القليب ويصلق بالحوض (يسقي ) وله قصيد مانا حلوه ووحيه دنداني , وبس إيلافت يم جهة بيت (ن) بقصرهم من مشرق , وإحداته على القليب :
لزاقي يشرب الدهان - - - لزاقي يشرب الدهان - - - ياهل البيت – لــــزاقي
ويوم قضى من السقي وجى يم بيته تشاورنا وهقينا أنه ولد هويان وذابحه الهوى, ولد(ن) خفيف نفس وهاللسان الحلو وهو يحلف علينا بعد انا غير نقضي حق الظيفة عنده-حق الظيف ثلاث ليال-, وهاك الليلة (الليلة الثانية) عقب ماتعشينا من المقسوم ويتعلل معنا وقال : أنتم ياهل العليا يالرولة يابعد حي ين رجال(ن) دايم(ن) محضضين دعوتكم تصيب -تمنوا ان الله يجيب لنا قوم مغيرة وأني افزع مع الفزعة واصوب صواب(ن) سلومي (جرح خفيف براني ) قلنا وش هذا يامعزب الرحمان ,شلون هداك الله نتمنى عليك الموت وانت لحية(ن) غانمه مكرمنا ومانت مخل(ن) علينا قاصر ابد ابد ؟؟! لابالله هذا مايصير ولا حنا قايلينه !! ياولد مايصير هالحكي ابد !! قال لنا راع الليحسه : أنا سايق عليكم الله وجاه أربعين نبي أنكم تمنون لي هالمنوة يابعد حيي!! . قاله اخويه الكبير : ياولد أكيد ان فيه سبب هاللي خلاك تمنى هالمنوة القشرا على روحك ؟؟! قال: يابعد حي فيه وحدتن بهذا قريب راعيت هالبيت اللي شرقينا , أكيد اني ياصوبت اكيد انها تزورني !!وأشوفها ومالي حيلة(ن) على شوفتها!! عاشقها عشاقه وغلاها يمشي بدمي , وان انتثر بهالقاع فدوة(ن) لها يابعد حي ين فدوه !!هو بس تحصل شوفتها ؟؟! أويليييه ويقوم يفرك ايديه ابعض ...وأنا وأخوي نبحر لبعضنا متهولين من اللي نسمع , وقلت له عين خير ياولد واللي الله كتابه ألينه غير يصير أبد.
والصبح وهم يصبحونهم لهم قوم صباح , ويصر الصياح بالعرب ""القوم القوم اخذت البل "" وهو مثل ماتنمى البارحة عندنا وهو يفزع مع الفزعه ويوم نكسوا الحلال وردوه من القوم اللي بعضهم غدى منيع عند العرب اللي حنا عندهم , وبعضهم ذبح بالفلاة , ياهذا هو معزبهم الولد الشمري حصانه يقاد به , وثيابه كلها دم وهو مصوب(ن) بكتفه اليمنى بله رصاصة ,وهي تنطحهم أمه قبل لا ياصلون به البيت ياجرحه دمه يسيل ويغدي لها نعى ,وهو يحكي عليها ويطمنها ويحولونه الرجال اللي معه للشق ويجضعونه ويرسلون على الحكيم عشان يطلع الرصاصه من كتفه , ويومنه جا وقام وجهز موسه اللي غدى احمر من النار والولد الشمري وهو يضحك قاله حدى الرجال اللي من ربعه عنده :انا لله وانا له أقول ماهي حزة ضحك! وهو عينه يم جهتنا وعينه علينا قاله :ماعليك يابعد حي مامن خلاف علّي هذا صواب(ن) سلومي ,يقولها ويتبسم والحكيم هو يكويه عقب ماطلع الرصاصة ومن حر النار انصرع وحنا نمسكه , قالنا الحكيم خلاص ماعليه خلاف بإذن الله ساعة زمان وياعي , وعرفنا أنه وحيد امه وماله قرايب(ن) بالحيل عند العرب هاذولا .
ويوم اخذنا لنا شوين ياهي هاذي جت هاك البنت اللي مانا حلو زولها ومنطوقها يوم قامت تهني ام الولد بسلامته , قالت لها أمه هاذا هو بالشق يابنتي مايدري عن اللي حوله ,تعالي يمه وهي تجي وتاقف عند راسه لها شوين وتهايق على صوابه يومنها محشت دموعها بطرف شيلتها وهي تقفي بسرعة من عنده . ويومنه وعي ونهيه بالسلامة ونسولفه اللي صار من البنت وقاله اخوي الكبير ياعاد هالبنيه تغليك كل هالغلا !! انت وشنت بطلبه ؟؟ ليه ماتاخذها وتحطها بيتك يعاد من حمدالله وشكره الله مره(ن) عليك ؟؟!بيت وحلال وماعليك قاصر ابد !! قال الشمري : عقب ماتنهت وكص من جرحه اللي نسيه بكبره !! وحط يده اليسرى على متنه المصوب واستقعد وتربع : أيه ياراع العليا هذا هو اللي قاصم(ن) ظهري وجرحي اللي مايبرئ ؟؟! هذا ياوجيه الخير مرتين اللي اطلبها من ابوها وسقت بها خياره من حلالي اللي شوفت عينكم بس انه مارضي بي وعارف(ن) اني ماني من العرب ولالي بني عم(ن) قريب واجد بهالديرة !! وحط له شرط سنع طردت(ن) يابعد حي !! عشان يعجزني به , قال : الحلال هذا كله مالي لزمة(ن) به سياق بنتي خمسين نيرة عصملي ذهب كان عندك تعال , والمرة الثانية بعد اسوق عليه له جاهه وقال مثل ماقال بالأوله , وهو يدري انهن ماهن عندي بس وش أقول يابعد حي ين ماغير حسبي الله عليه من ابو !! وكل هذا وحنا نسمع ونشوف , ونتشاور بليلتنا من هالأريا بيننا يومنه نام معزبنا بفراشه أنا ندفع الذهبات الخمسين اللي معنا كلها سياق للبنت ونجوزها للولد .
ويومنا اصبحنا وافلحنا وفكينا الريق قال له اخوي الكبير: من هو من عربك اللي تثق به وتهقى ينشد به الظهر سمه لنا ؟؟! قال الشمري : وشو من جهنه يابعد حي ين ؟؟! قاله اخوي: خلاص ياوجه الخير حنا قطعنا على الراي البارح ماحنا شراية أباعر , اللي عندنا جاك سياق(ن) للبنت مار أرسل للي تهقى به الهقوة الغانمة خله يقضب الرجل لا يتراجع عن وعده لك ياعرف ان طلبه عندك !! قال الشمري عقب ما برك على ركبه وبغى ينهض : وشنتوا بطلبه يابعد حي ين وش هوه هااللي اسمع ؟؟! مايصير ياهل العليا وحياة ....قالوا لاتحلف ياولد اللي مايصير هو انه ينكس كيس هالذهب معنا لأهلنا !! وكل منا يقرط الكيس اللي معه على معزبنا الشمري , ويوريه اخوي الكبير الذهب اللي به (خمس وعشرين نيرة عصملي ) ويحطها بكيس(ن) واحد عقب ماعدها قدام معزبنا !! .
ويرسل للي سماه من عربه ويروح معنا لأبو البنت ويطلبها منه , قال لنا هوعارف(ن) طلبي قال له الشمري اللي معنا سم طلبك يارجل هاذي جيزة ؟! قال خمسين نيرة ذهب عصملي نيرة تنطح نيرة , قاله ياولد طلبك عندنا مار أنهد على كفيلك وانا قبيلك ؟!!( طلب كفيل عليه – وصار هو خصمه) وهو يعطيه اخوي الكبير الكيس اللي به النيرات ويعدها على ابو البنت نيرة نيرة لها صليل ياما كملن خمسين , وبالليل يملك له على البنت وهو صويب جرحه مابري , ويزفها قطعة رجال ومنهم اللي راح معنا بالجاهه لمعزبنا الوليده لحد بيته , ويصير العرس هاك الليلة , مامن عرس بسيط .بس أمه ألحاها لها زغريت وجنها قطعة حريم قصيراتها يباركن لها .
والصبح ونمشي لك من عنده وقلنا له : اسمع ياوجه الخير أنت عرفتنا وحنا عرفناك ولا بيننا شين غير الخوة الزينة لا تضغط على روحك بالحيل من شان النيرات , معك معك متى ماسهل الله عليك ردهن .
وعقب فترة وهو يجمع الشمري له خمسين وضحى من خيار البل اللي الوحدة تسوى إلحالها نيرتين ذهب وبعضهن ثلاث نيرات أباعر طيبه كلها خيار, ويجيبها يسوقها رحولها معها, ويومنه وصل عربنا وشفنا البل قال له أخوي الكبير : ياولد ماهاذا الرأي اللي بيننا وبينك ؟؟! هالبل هاذي الوحدة تسوى لها نيرتين ولا بعد بعضهن أكثر !! وهذا أكثر من حقنا اللي لنا عندك !! هالسواة ماتصير ابد ابد !! قال الشمري : مثل ماقلتوا لي يومنا بالعراق أقولكم هنيا !! اللي مايصير أن ناقة وحدة تنكس معي يم أهلي , انتم يأهل العليا راعين الأوله يابعد حيي !! وراعي الأوله ما ينلحق ابد ابد................))

لنا لقاء يتجدد........................بأذن الله
كتبه لكم ..........................[[ اخوصيته ]]

12-26-2008, 01:57 AM

روعه ماشاء الله
الجزء هذا رهيييب بكل مافيهـ
تسلمـــ الايادي
يعطيك الف عافيهـ

(( متآآآآآآآآابعه ))

أدوات الموضوع	إبحث في الموضوع
مشاهدة صفحة طباعة الموضوع أرسل هذا الموضوع إلى صديق	إبحث في الموضوع: البحث المتقدم
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الإهداءات