ياطير هات أخبار علم المطاريش=اللي بشوفتهم يزود إنتعاشي
هات العلوم الصافيه دون تشويش=يمكن تطفي نار قلبي وجاشي
ياطير ياحظك معك ناعم الريش=ماشلت هم ولايجيك إرتباشي
ياليتني مثلك على الهامش آعيش=ولاهمني كود الطرب والمعاشي
سلم على اللي ماشكى ولاسأل بيش=رجل ن على درب النواميس ماشي
حلفت لوشفته لأذب اللواليش=وأذبح لهم عشرة ذبايح وحاشي
ذاك الرفيق اللي لياجيته إيشيش=إيشيش من قلبه على الطيب ناشي
ليابعد كل الخبول الدراويش=اللي على درب الردى والخشاشي
راحت حياة اللعب والضحك والطيش=يومن قلبي طاش ماطاش طاشي
واليوم أحس الصدر يدوج به جيش=وحربن ضروس وحكمها حكم فاشي
وجسمي من فراقه تقل يشبك بفيش=ليانتفض عيني يجيها الغباشي
أبسألك ياطير وشو وماويش=وهات العلوم المستخبات كاشي
ورح قلهم ولاتسأله صاحبي ليش=وقله ترى جسمي يصيبه نشاشي
والكبد والعين الشقيه معاطيش=عز الله إني صرت عقبه طشاشي
وقصيدتي جتكم على قافية إيش=وشعري نخاكم وإنتفض ثم شاشي
وهذا الجزل جبته ولابي العراميش=إما كذا الأبيات وإلا بلاشي