لا ضقت يا قلبي وقمت إتطرّى=شيِّك على أعضائي ، وذبْ الطواريق
وهات أجمل الألحان جهر ٍ وسرَّا=ألحان يشربهن من الناس ذوِّيق
ولو القصايد زادت الحر حرَّا=أشوف فيها راحة ٍ للمعاليق
والشعر في عيني شجاع ٍ مضرَّا=ضربه يفلق هامة الضد تفليق
ياما عطاني كل خير ٍ وشرَّا=وياما عطيته من علوم ٍ مطاليق
أغليه لو صدري لوجهه تعرَّى=وأهيم به وأدراه مثل العشاشيق
ماسرّني إلا بعد ألف ضرَّا=ولا ضرّني إلا فتق شق وشقيق
عاشر شهر أكنها وأتدرَّا=عبرة ،ورى عبرة، وقلِّة توافيق
عاشر شهرأرجي السعة وأتحرَّى=لطف ٍ من الباري بديع المخاليق
عاشر شهر وأبوي عنَّا مورَّى=في مظلم ٍ تطيش منه المواثيق
يا الله يا مالك بحرها وبرَّا=المعتني بالآدمي بالمضاييق
عطفك ولطفك فيه ضيفك معرّى=إنت الكريم وكلنا لك مشافيق
ما خاب من هو إلتجى لك وفرَّى=ولا فاز من عنك إعتصم بالشواهيق
والوقت ما وقّف لأحد مستمرَّا=ولو البلاوي كل حيّ ٍ له اتويق
شربت من كأس الكدر ما تطرَّى=ثلاث مرات ٍ، على فكة الريق
وا أخوي يا اللي شوفته ما تسرَّا=بيديه ورجلينه حديد ٍ مغاليق
سبَّت خطأ وأدري الخطأ ما يقرّا=خطأً يشلق مهجة الصدر تشليق
أحيه حره بأوسط الصدر حرَّا=ومن جور حره صرت مثل المعاويق
ويا الله عسى خالد عدن هي مقرَّه=يا مالك الأملاك غرب ٍ وتشريق