دار الفلك سبحان من دار الافلاك=هذي يطمنها وهذي سمكها
دار و بداية دورته بامر مولاك=اكوان سبعه في جلاله مسكها
و درنا معه حنا و ذولا و ذولاك=كلن له اطلا لن قديمه تركها
كم واحدن ما بين حلمه و الادراك=اروى الوساده من دموعن سفكها
و قتن ضحك لك ضحكتن ثم بكاك=ما عاد تنفع ضحكتن لك ضحكها
كوكب عليك او في كعوبه توطاك=و وراك من عقب الفضيه ضنكها
تبدلت ما هي منايه و لا امناك=بالرجل ناطا شوكها مع حسكها
الحر من ذله زبن خم الادياك=و ماتت بحلقه صرختن ما صعكها
و الخيل من داست هل الخيل دنياك=ما عاد تفرق كدشها من رمكها
شين حصل لك كان من فعل يمناك=يا من عماها يوم عينه عركها
ادري دوام الحال لوطال و اغراك=امرن محال و في كماله دركها
لو دامت لغيرك هنا و صلها اخطاك=غيدا حسينه عبدت اللي ملكها
يا ما من اول همها تكسب رضاك=وتدور ودك لين طحت بشركها
لا شك غدر الوقت سبب لك ارباك=و ا نحى نجومك عن مجرة فلكها
و دار الفلك دورة و عدى و خلاك=و حدك على عوج الدروب وسككها