ألفٍ: أنا فدوه لكل القرابه=اللي على راسي غلاهم اعصابه
ومشاعري للكل فيها تشابه= قلبي لهم زلّ وزهور وحصيره
والبا: بنيت بيوت شعري قصيده=اترك ركيك الحرف والجزل اصيده
ابني على المسحوب فني نشيده=والله هو العالم بخافي السريره
والتا: توّنست بجوار القرايب=اللي لنا معهم صديق وحبايب
عندي غلاهم مثل طش السحايب=حفظتهم جوّا البصر والبصيره
والثا: ثبت مجد روله بالقبايل=تاريخهم خطه اعيال الحمايل
بالشلف وركوب المهار الاصايل=اليا انتخوا [عليا] تشب السعيره
والجيم: جيش العز فيهم تزبّر=لا طبوا الميدان والجو غبّر
معهم تموت اعزوم منهو تصبّر=من فعلهم صارت حياته خطيره
والحا: حنيت الراس قدر وحشيمه=للي لهم بالقلب مجدٍ وقيمه
قبيلةٍ بين القبايل عظيمه=ربعي هل العليا سيوفٍ شطيره
والخا: خبرهم بالمخاليق ساري=ياما لهم بالعز ذكرن وطاري
قلوب الذيابه والوحوش الضواري=مكانهم باول خطوط المسيره
والدال: دورٍ فات واليوم هلاّ=قدر اروله فوق الخلايق تعلا
والغدر عنهم بالمراجل تجلا= والطيب لبسوا سندسه مع حريره
والذال :ذادوا عن حماهم بالارواح=ومن فعلهم عطر المواجيب فواح
وادناهم اللي للطوابير نطاح=بالسيف والشلفا وحب العشيره
والرا: رمتني بالعيون النواعس=برمشٍ خجول وبالصفات امتقاعس
من نظرته كنه على القلب داعس=من حبها قلبي عطاها جفيره
والزا: زما بالجوف صافي غلاها=واورق بتربة ناظريني حلاها
وتاهت مشاعر غربتي في فلاها=وش عاد لو صارت لجرحي سفيره
والسين: سوت في خفوقي سوايا=والله هو العالم بغيب النوايا
هي علتي واكسير طبي ومايا=لو انها مع تعس حظي نصيره
والشين: شان الوقت من فقد خلي=وش هالحياه بدونها بس قلي
عمري فداها لو يضيع ويولي=دام انها بكوني ثريا مُنيره
والصاد: صادتني بفخ المشاعر=باحساس رسامٍ مع اجنون شاعر
وبغيابها جمر انتظاري تساعر=حيث انها وردة ثراي وعبيره
والضاد: ضيعنا الشيم والعوايد=اللي من الاجداد حكمة قصايد
من عقب ماهي برقبتنا قلايد=ضاعت ولا معنا قشور الشعيره
والطاء: طبع الناس شان وتغيّر=فضاصه وبخل وجفاء وتطيّر
وباسوأ صفات العالمين انتعيّر=الا الذي ربي عطى الناس خيره
والظاء: ظفر الناس ماحك جلدك=والشوك ماتجنيه من طهر وردك
وغيث المطر مقرون مع لسع بردك=دنياك ماهي خبزتين وخميره
والعين: عادات الرخوم الذميمه=غيبه وبهتان وفجور ونميمه
والذل وفعول النفوس السقيمه=من داسها معروف غبّة مصيره
والغين: غاية كل حيٍ ومعبود=طاعة ولي العرش بالفعل والجود
والآدمي محدود بقيود وحدود=دينه ويلقى الخير جنبه شويره
والفاء: فرّيس القبيله على الراس=تاريخهم مجد وجواهر والماس
سادوا بعزتهم على نايد الناس=بوجودهم حجم الكبيره صغيره
والقاف: قامة مجولٍ والدريعي=خلت مخالفهم يروج ويطيعي
ومن عقب ماهو صقرٍ اصبح مريعي=من طاري الشاهين زار الحظيره
والكاف: كون اشقر لنا خير شاهد=للنوري اللي مايخون المعاهد
اللي لدرب المعركه صار ماهد=والمنفتق ماغير تسمع هديره
واللام: لو قلت الشعر أو بدعته= فيهم فلا اكمّل طريقٍ قطعته
ولو باكتب اللي في اذاني سمعته=حرف الشعر تلقاه وسط الجبيره
والميم: مات الشعر واصبح بضاعه=لايطربك نظمه ونغمة سماعه
الغث والمُبهم محطة يراعه= كله رموز وطلسماتٍ وحيره
والنون: نظم الشعر وايا القوافي=مثل الزهر لانور بقفر الفيافي
ومغلّف بتصوير واحساس دافي=تغريد بلبل في غناه وصفيره
والهاء: هبت بالمشاعر رياحي=ودليت بحروفي متاهة نواحي
وضمدت بالمعنى بقية جراحي=وارويت كبدي بالبيوت النظيره
والواو: ورد الروح مني لفاكم =والقلب مهجة خاطره في لقاكم
واكبر دليل انه جحدني وجاكم=وامواهكم تجمعت في غديره
والياء: ياربي طلبتك رجائي =تجعل ضياءك في طريقي ضيائي
ونور بنورك إسودادة سمائي=والطف بنفسٍ من ذنوبي ضريره