سلسلة في حلقات ..... [[ خطوات علا درب الأبل ... نتقتفي أثارهم ]]..
الحلقة : الخامسة
الزمان : 1381--- 1382 هــــ .
المكان : ظهرة الشويحطية – منطقة الجوف – شمال المملكة
بطل ... هذه الحلقة :: غازي بن ثاني بن غانم الفطعلي المديغمي الكويكبي الرويلي ...
المصدر :: أكثر من مصدر من رجال الكواكبه ... وأكدها لي ابن عمه ...(( ربيع بن عيد المديغمي الكويكبي الرويلي ..))

وهذي السالفة ..... (( من هالسنين معازيبي حول كبد بأطراف الحجرة وأركب ذلولي ابي يم الجوبة ( سكاكا ) مبطي عن أهل(ن) لي بها لي سنين عنهم ... ومع فجة الضوء اركب ذلولي وبها زهابي ومعي سلاحي كامل وماني خلي بعد !! معي قنبلة من بقايا جيش ابو حنيك ودايم معي ؟!! تاكل وتشرب وتنام وتقعد وماحد(ن) بها داري .. بلها خريطية على قدها وعليها لها لفافة جوخ من الشام !!!. وكل هالسنين معي وما سويت بها شين .. الزبدة وانا أرد على خوعا واسقي ذلولي واتريح لي شوين وأجيك منحدر مع ظهرة قارا ابي ياما يدمس الليل واروح الجوبة ... لي بها معازيب ونسابه و انا اصلها بليل واظيف بيت ابن عمي سالم النجدي بله دوريات بوسط سكاكا .. وما بغيت اجي على طول يم اهلي اللي بها ؟؟. وهالك الليلة امرح عنده .. والصبح وهو يرسل عليهم وهم يجون مسيرين عليه عنده .. وهاك النهار وقبل العصر يوم هاك الرجل عند باب الدور بالخلا وله تصاويت :: يابو سالم يالنجدي ياسالم .. ياهل البيت ... وهو يطلع عليه سالم واخذ شوي وهو ينكس علينا يامار وجهه ما هو زين!!!. قال لي انت متوكد ان ما حد شافك يوم طبيت الديرة البارح!!!؟ . قلت وشوا من جهنه ؟؟ قال قل بس انت علمني متوكد وإلا لا ؟؟ . قلت لا بالله ماني متوكد زين مع اني حريص ان ما حد يشوفني !!. قلت علمني يارجل بالسالفة ؟؟. قال هذا حدا خويا الأمير عبدالرحمن السديري .. يقول : الأمير انت وظيفك الليلة تقهوون عندي بالبستان !!!. قلت خير ان شاء الله قال سالم النجدي الله العالم انه يبيك من شان السالفة اللي مبطي لها سنين وانتهت !!. ليا هالحين ماهو ناسيها .. قلت يارجال وكل الله ما يصير غير الخير .. وانت من خوياه وراعي ديرة مالك عنه ومالي عنه !!!.
بس خلنا نروح ونشوف وش عنده من العلوم !!!. وحنا نروح للبستان واسلم على الأمير وهاك الليلة سوالف وتعلله وحنا نقوم نبي نترخص للسريه قال السديري : ياسالم باكر حنا طالعين وخويانا مخيمين بظهرة الشويحطية وعشى ظيفك نبيه هناك .. وارسل له حدا خويانا ياخذه بالهاف ..سالم النجدي اعتذر من الأمير من الروحة وانا قلت لا بالله تك يابو فيصل....
وحنا نسري من عنده لأهلنا .. ويوم جا عقب الضحى يوم السواق ومعه الرجال عند البيت واركب معهم ونطلع على مخيم الأمير حول فياض العوجا .. عند الغياب ونحول .. ونتقهوا يوم(ن) السديري ما هو هنيا رايح(ن) يقولون العصر يتقنص مع بعض رجاله وقالوا انه يروح علينا قبل وقت صلاة العشاء .. وحنا جالسين يوم(ن) هاك الرجال عيونه بس بعيوني كل ما اغضيت عينه عليّ!!!. وهو قاعد حول النار ويتقعهوى من الدلة وهذ1...هو كل شوي يهلي ويرحب بي ويوم(ن) كل الرجال اللي عندنا كل منهم قوطر كل يقضي حاجته .. وهو تقل من امس يقمز ياهو عندي !!!؟ . قال انت الفطعلي غازي ؟؟ قلت أيبله هو .. قال انا عزيز(ن) عليّ سالم النجدي ودريت انك ابن عمه واللي يعز عليه عزيز(ن) علّي ..
اسمع شف حدا الركايب ها اللي مبركات وانحش عليها الليلة قبل الصبح !!!. ترني سمعت الأمير يقول لحدا خوياك اللي جابوك ياروحتوه ودوه يم القصر ؟؟؟!!!. قلت كفوا والله ونعم بيض الله وجهك .. وهو يرجع لمكانه بسرعة قبل ما خوياه يفطنون له .. وشوي يوم جا السديري واللي معه . وهم يحورفون بالعشا علا طول.... والأمير له : سوالف مرة يسولف علي ومرة يسولف علا اللي حوله .. وانا هالحين ماني يم سوالفه كلها !!!. اسولف بالهربة وشلون تصير وادير التفاكير بها لحالي !!!. وانا القاها .. قلت مالي غير مع القلطة ياقاموا الرجال علا العشا اعقبهم علا الذلو ل واركبها !!!. وهذ ي هي فرصتي ما لي غيرها ... وعيني يم الذلول ألأخسها بطرف عيني يمار هي كل شين عليها وباركة وجهها غرب .. ما هي يم جهة احد .. قلت بس جابها الله . ويومنه برزوا العشا قدام المخيم قال السديري : يالله يالرجال افلحوا كل(ن) من قبله .. وهي تقوم الرجال وانا رافع عباتي وبهالحكي علي لي كبوت وتحته جاكيت .. وفردي والقنبله معي بحدى المخابي !!!. وانا اتعدى الصحون كني ابي اموص يديه بلهن مويه قبل العشا .. وبوجهي للذلول ومن امس وانا عليها وابطحها واخليها بوجهها واسند شعيب شويحط .. واطب الأمحاص ابي بهالحكي حزم الجلاميد وجهتي هالوديان الأرض العفثه .. وكل ليلي وانا بظهرها وغلبني النوم وجه الصبح !! وانا على الشداد ما حولت ويوم رفعت راسي يامار وحي السيارة عندي !!!. وابحر زين قبل لا يشفق الصبح يوم الضو هذا هو مقبل علي والذلول الماخوذه ذلول خدام ضروة سيارات ما تجفل منها وهي تنحر السيارة وانا اخبطها ... اخبطها برجلي ما معي حتى العصا !!!. وما حولت عن ظهرها من الشويحطية .. وانا اعجز عنها .. واطبق من ظهرها واخليها على فالها واجي بهاك الدبل وانبطح ... وعيني لها يوم(ن) ضو السيارة انحرف يم جهة الذلول ويقافون عندها ويحول عليها واحد(ن) منهم..ويمسك رسنها . وهو يقوم يقودها بأثر السيارة وانا عيني لهم منبطح(ن) بمكاني !!!. كل هذا احسبنهم خويا السديري يدوووووورون علّّي !!!؟
وكل نهاري بالدبل ما فارقته اتنى الليل بس يجي . بالشعبان اللي حول سحل عمرو.. ويوم امسيت واقص الأثر وانحدر وارقى وهذا انا معه معه .. يوم ضوح التار من بعيد واقرب حيل وامشي وادلبح واسمع وحية الرجال !!. واقرب بعد وانا اتتقى بالرمث والشجر ياما قربت لهم زين .. يوم هذي ذلولي باركة وهذا الهاف اللي شفته الصبح واقف .. والرجال جليسة حول النار ولهم ضحك وسوالف ... وهذا شوي شوي شوي .. وانا عازم(ن) على راي(ن) واحد !! اخذ ذلولي واكمل دربي اللي نويته من أول!!!؟.
واطلع الماخوذه اللي لها معي سنين ؟؟. قلت هذا يومك جاك . ويوم الخلاص منك والتلمس اصبعها واطرفها وخطتي اني اجيهم من يم جهة النار عشان ما يشوفوني ؟؟؟!. وارميهيا عليهم .. واركب الذلول وانحاش بهاليل اللي يسلم منهم أكيد انه ماهو مدورني .. يبي بلش بخوياه ؟؟؟.
واتجهز للغارة عليهم واسمع واحدن منهم قولته ..." والله يابو ممدوح .. ما شفت بحياتي مثل هالرجل !! اللي من شافنا وحنا ما حنا حوله !! كيف طبق عن ذلوله وانحاش وخلاها !!!. كيف يخلي ذلوله وهو من خويا السديري ؟؟ . الذلول بينه عليها وسم .......... وهن ركايب الخويا . قلت لحالي هاه ...عمري سامع(ن) ها الوحي ؟؟!. ومنهو ابو ممدوح ؟ معقولة وانا اتريض شوين وازحف على بطني ياما قربت حيل ويوم لاح ضو النار على وجه حديهم واعرفه زين واستدير يم جهة اللي يحكون عليه يامار هو الشيخ أورنس ... هاه الشيخ أورنس .. ياعقيال الله عقلاك .. الحمد لله اللي فكني من هالسالفة اللي بغيت اسويها !!!. وانا اتلقط نفسي وارجهن واتسمع لسوالفهم واضب الماخوذه!!!. واقوم وانحرهم .. واتلطم وبوجهي للذلول وقالوا وش انت ياراجال .. وهم يجوني عندها .. قلت انا راعيها .. وبالحكي ابو ممدوح جالس مكانه .. قال لابل لله ما انت راعيها ؟؟؟. هذي من ركايب الخدام وعليها الوسم ؟؟ وانت وحيك ما هو غريب عليّ .. وهذي ما هي لنا نعطيها من جاها ؟؟. وان افك اللطمه .. وانحره واسلم عليه .... وهو يقوم وينطحني وهو يقول : والله والنعم والله وسبعة أنعام بخالي .. ياهلا .. كفوا... كفوا... كفوا والله يخالي !!!. شفتوا يالربع تروا هذولا خوالي الصحيح ... واتعفى واعلمه بالسالفة كلها ...
قال الليلة تمرح عندنا وترتاح والصباح فلاح !!!. ويومنه فج ضو الصبح قال لي انت تدل مكان عبدالرحمن السديري زين ؟؟؟. قلت ايبله يابو ممدوح .. قال اجل يالله يمه !!. قلت وش تقول ياطويل العمر ؟؟؟!!. البارح وانا عنده !!. قال أقول يله بس يله اركب .. ألأيا متى وهو مطلبك بسالفة مبطي قضت وانتهت ؟؟!!.
وحنا نركب ونجيك مع الحماد فوق هاف أورنس اللي تقل شيهان .. وتي وتي .. ياحنا طالعين على مخيم السديري قبل صلاة الظهر .. ونوقف وهو ينطحنا الأمير عبدالرحمن !!. وانا أباريه ويسلم علينا يهلي ويرحب ... يالله تحيي ابو ممدوح ... ويقعد الشيخ أورنس بصدر المجلس وهو يصوت لي قال تعال خلك على يساري هنيا !!!. قلت بقلبي "" ياسبحان الله العظيم .. شف الدنيا والمقسوم !!!!. وقدرة الله فوق كل قدره سبحانه !!!. البارح متهوم مطلوب ومطارد !!!. واليوم ظيف معزز ومحشوم ؟؟!!. قال الشيخ أورنس : ماهي كثيرة يابو فيصل ... هذا الرجل خالي .. وسمعت انك أطالبه بشين ؟؟؟. والذلول ترها عندي والليلة تروح عليّك وانا جبته لك ..
ياأنك تبريه وتطلقه !!!. يانك تخطيه وتحبسه !!!. كلنا معك على المايل والمخطئ !!!.
والخطأ خطا ......... ما نرضاه أبد أبد ... قال السديري : لا بل الله حليتها يابو ممدوح !!!. حنا نحاكمه بحكمكم يالرولة !!!. خله يحلف عنها !!!. وهو بحر لي الأمير يوم(ن) عيونه يقدحن شرر.. قال لي : قم احلف ياغازي .. بس خطو الخوطه .. وهو يقوم واحد من رجال السديري وهو يخطها برجله اليمنى (( الخوطة دايرة على الأرض يقف بوسطها المتهم وعينه جهة القبلة ويحلف بالله العظيم ثلاثا عن الشئ ......))) .
وانا اقوم واقف بها واتقبل القبلة .... قلت يابو ممدوح الله ماهو جغمة ميه ... الله ماهو جغمة ميه ... لا بالله العظيم اشهد ان السالفة صحيح وأنها بعبي هذا ... بعبي هذا ...ويدي على بطني .. واحس اني ماني علا الأرض خلاص زملت بالحيل !!!.
قال الشيخ أورنس خلاص بس بس... خلاص خلصت خلصت .... قال السديري لا بل الله ترها يابو ممدوح خلصت !!!!.
وهو يقوم وانا معه ونركب سيارتنا وشفت الزعل بعيونه وما حا كاني وما حاكيته يا ما جينا خويانا .... دريت انه زعلان مني .وعشاني... لأنه حلفي قدام السديري !!!!.
وهي تنتهي سالفتي مع عيدالرحمن السديري للأبد ..... والبركة الشيخ أورنس بناخينا ابو ممدوح .......))))
لجميع المتابعين انتهى المشهد........الذي يؤكد المقولة التي نسمعها {{الرويلي ......ما يحلف }}
و لنا لقاء في حلقة قادمة بأذن الله تعالى ....
محبكم .................................................. .................[[ اخو صيته ]].

السلام عليكم ورحمة الله وبركاته

رحم الله سبع الصحراء الشيخ الشجاع المشهور

اورنس الشعلان وغفر لنا وله

رحم الله غازي الفطعلي وغفر لنا وله ..

رحم الله اموات المسلمين عموم ...

قصه من اروئع القصص واطيبها

اخي الفاضل اخو صيته

كلمة شكر لاتوفيك حقك

فجزاك الله عنا كل خير وجعلك ذخر لاهلك في هذا المنتدى

بيض الله وجهك وحفظك من كل شر

لاتحرمنا من جديدك الممتع جداً .......