من باعني بالرخص وشلون أبشريه = واللي شراني كيف أبيعه بضيقه
الـحــلـم وردي يـازمــان الـمــشـاريـه = بين الاماني والامل والحقيقه
صدق الغلا ياسكة الغي والتيه = بيض النوايا والقلوب الرقيقه
الضيق مايبْعدك عن حي تغليه = لو تشتعل كل الاماكن حريقه
المر كأسه نشربه لجل حاليه = لو مانطيقه غصب عنا نطيقه
ياشين وقت أفراق غالي لغاليه = بين المواجع والجروح العميقه
القلب هم البعد والهجر طاويه = بعد أختلافات العهود الوثيقه
اللي بقى ياهاجسي وش تسميه = والجرح يكبر من رفيق لرفيقه
جرحً سكن بين الخفوق ومحانيه = يكبر مابين الثانيه والدقيقه
أسج والذكرى القديمه تصحيه = ماكن صوتي نــّـشـف الهم ريقه
وعشقي وتفكيري وصدري ومافيه = هتان وطعون الليالي عتيقه
شعري كتبني في شوارد معانيه = يالهاجس اللي بين همً وضيقه
ماكل مايطري على البال نبغيه = ولاكل نفسً للمواصل شفيقه
وصدق الغلا فوق العتب والمشاريه = نبض الصدور اللي وفاها حقيقه

أسألك باللي فتني فيك صارحني = هو أنت صـادق معي والاّ تـسلابي
أي والله أنك بسيف الود ذابحني = أبكي أفـراقـك وأنا أشوفـك على بابي
لا أقفيت عني سموم الشوق تلفحني = ولا أقبلـت كنك تـصب النار بثيابي
أتعبتني حيل تكفى لا تريّحني = بـك عــّدنـي عـن هــــواك ولا تـعـدابـي
الى متى وأنت طـيـفً مايـصافحني = وأنا أدمح الذنب وأمسح دمـعـة عـتـابي
أن جيت أخفّيه وسط الصدر يفضحني= سيلاً من الشوق يمك ياأقرب أصحابي
أبي الصراحه حبيبي أيه صارحني = وش صار مـني وش اللي صار بـغـيـابي
ماني بخـاسرك وأنته مانت رابحني = ذاك أول الـلـي لـيـامـن جـيـت تـلـقـابـي
أمـوت لك من وفـايه وأنت تـذبحـني = والله مــصـيــبـه أذا قــصـدك تـلــهـابـي
أعـظم ذنـوبي أحبك وأنت سامـحني = عـن كل ذنـبً تـحـمـلـتـه مـن أسـبـابـي
يلعن أبو الحب لو الحب مالكني = يـلـعـن أبـو الـصدق لـوهـو سـاكـن أهــدابي
وأسـألـك بالله وش نــاوي وريـحـنـي = يـا أول وآخــر وأصـــدق وأكــذب أحـبـابـي