من عوايد شيخ مايخل العوايد = ينتخي لاجاه طلاب اللزوم
شيخنا اللي فزعته وقت الشدايد = ماتركني للدنافيس الرخوم
سامي ابن أورنس من رؤس البدايد = لاسمعت أسمه وانا جالس أقوم
يوم ضاق الكون ماحولي سنايد = فز لـيـّه فزة أحصانٍ عزوم
الشجاعه ورث والهقوه بعايد =فزعتي لامن غشى جوي غيوم
من نسل أورنس لاشبت وقايد = في شموخه هيبة الحر الجزوم
بانت رجال الوفا ؟ واهل المكايد = والتجارب حدها سيف السلوم
أشهد انه قايدً من راس قايد = منزله دايم بعالية الرجوم
كنه القرناس لامن هــد صايد =عل موتي من قبل موته بيوم
كايد الصعبات يوم الطيب كايد = صادق المبدى عسى عمره يدوم
شاعرً غنا جزيلات الفرايد = في جناب الشيخ بالعز محشوم
لبـّس المعنى من اللؤلؤ قلايد = واعتلا فوق الثريا والنجوم
والله انه ماتوفيه القصايد = تاج راسي مسندي سد اللزوم

أن قلت أبن شعلان واثــق ولا أخاف = أقصى العرب بالمرجله عارفـيّـنـك
يشهد لك التاريخ في كل الاعراف = غصباً على اللي بالوفا حاسدينك
عن وصف تاريخ الفخر يعجز القاف = يامعــّرب الجــدين دامــت سنينك
علمك بذكر الطيب ياعــزوتي ناف = كنك عــقــدت الحلف بينه وبينك
مـابـيـن هــذا وذاك والحـق بأنـصـاف = ياشـبـل من ذاك الاســد خابـريـنـك
لك في دروب الطيب سيره وميقاف = وربي على مشوار دربك يعينك
شيخٍ ولد شيخٍ بنخوه وميقاف = يفرح بك اللي قال بالضيق وينك ؟
لاقلت أبن شعلان واثــق ولا أخاف= عــزوة هـل العـلـيـا سندك ويمينك

سوّد الله وجـه الزمـن الـردي ياخـوي = وبيّض الله وجهك .. كثـر مانتـه عظيـم
من كثـر ماشربتـك .. مابغيـت أرتـوي = ويش أسوي بطيبك يالجـواد الكريـم
بيّـض الله وجهـك عنـد كـل أبْــدوي = ويجعلك عند كـل النـاس رجـلٍ حشيـم
يالخّوي .. الخّوي .. المستحيل .. السـوي = وأنت كلك محـالٍ لاعْرفـك الفهيـم
أعذر الصادق اللـي لا ألتـوى لـك لـوي = لويت اللـي شكـى سهـم الحيـاه السقيـم
ذا هو الوقت كم مـره طوانـي .. طـوّي = ولا ذكرت الـذي شـرواك فيـه أستقيـم؟
ياصـدوقٍ أذا ذيـب الضـلـوع يْـعـوي = ما أختبى عن أصياحه مثل بعض الحريم
أنت عزمك قـوّي والله عزمـك قـوّي = وأنــا والله قــويٍ بـالألـه العظـيـم
وسوّد الله وجه الزمان الردي ياخـوي = وبيّض الله وجهك كثـر مانتـه عظيـم