يــا مــرحبا بـطـلـتك يا هلا فيك = اقـلط تربع بالحشا يا هلا بـك
اعطيك نون العين كانه يكفيك = سهمك تعلا وارتفع فوق سابـك
مدري علامي لا نظرتك يجي هيك = هزات جوا القلب تبغي جنابـك
ان كنت زعلان ٍ فانا جيت برضيك = قبل طلوع الشمس قدام بابـك
وكانك مريض ٍ يا حياتي نداويك = بس المهم يدّي ويدّك تشابـك
هذا كلام لواحد ٍ موت يغليك = يا عيون ( مانع ) ياحياته هلا بـك
قلي اخبارك وين حلت موانيك = هو انتصر الوقت والا جنابـك
آمر تدلل لو تبي بيضة الديك = من يـذن المسكين عليه هابـك
وإذا الذي يقرّبك توقيعي الشيك = نوقعه ليّا صار يقطع غيابـك
بدنيتي سالي واقطع من الكيك = واقول إدله يا ولد ويش صابـك
ادري حبيبك راح قصده يوريك = ادري غيابه هو سبايب عذابـك
إذا سرح فكري يسرح بطاريك = بين العيون وبين.. ضحكات نابـك
ما فيه بالدنيا منهو يساويك = أحلى بنات الكون صارت تهابـك
اللي يروح الحج يهدي مساويك = واللي يروح الشام يبغي يدابـك
واللي يجي يمك قصده يسليك = ويقطف ورود الحب باول شبابـك
انا احبك حيل الله يخليك = تعال واحضن قلب يشكي صوابـك
والحب سهل ٍ ما يبي زود تكتيك = إفهم كلامي واجعله هو زهابـك
ما تنفعك ضحكات منهو يجاريك = خلك طبيعي وقـللي كل مابـك
اشوف لك يومين زايد تحديك = واشياء غريبه مسطره في كتابـك
إحذر تغيّر يوم كبرت علابيك = والله لغير بـيـوم تـلقى عــذابـك
انا معك بالحب ظل ٍ يباريك = وإذا اختفى زولك ... يكفي سرابـك
القلب هايم والفكر دوم يطريك = يالله تعال الحين نوّخ ركابـك
فيني عروق القلب دايم تناديك = عطشان حبك ما سقيته لعابـك
ليتك تجيني دامني صدق شاريك = لعيون قلب ٍ .. بالحنايا حـكابــك
عطني عهود الحب يالله باياديك = هذا الذي عندي ...عطني جوابـك

المشاركة الأصلية كتبت بواسطة الريشه هلا وغلا بشاعرنا الغالي .. صح لسانك ولاهنت .. قصيده رائعه ..وتحفه فنيه لها وقعها الخاص اللي يروح الحج يهدي مساويـك ..........واللي يروح الشام يبغـي يدابـك ابدعت هنا كثيرا.. ننتظر جديدك ياصديقي دمت بخير..

المشاركة الأصلية كتبت بواسطة نايف الزيد حية وصح لسانك