الـــطـــيـــب خـــصـــلـه تـحــتـــويــهــا رجـــاجـــيـــل= ولاكل رجلن لابغى الطيب جابه
الطيب ضلعه للنشاما مداهيل = ضلعاً طويل ويتعب اللي رقابه
دربه صعيب ولا يجي بالتساهيل = مايسلكه ياكود رجلن مشابه
ليثً ليا منه حضر يدبل الكيل = نابه شطير ويكسر الصلب نابه
لا ثقلت حمول الزمن شالها شيل = وان شال حملً مايحـّـسب حسابه
حلال حلحيلن يحل الحلاحيل = رجلن على الشدات كلن يهابه
سلام للي بالوفا يسرج الخيل = قرمً على الطولات يتعب أركابه
ضرغام لامن انتخى يكرب الحيل = قــوّي عـزم وفي شموخه مهآبه
دروب الخطر يدوسها بعتمة الليل = ومن هيبته لابان تجفل ذيابه
( منصور ) ياللي ذاخره للمقابيل = فعل الكرم والمرجله هي زهابه
كفه ندي بالطيب ويـسـّيـل السيل = ووقت الطرد يزداد باسه صلابه
يمناه ببذل الجود مثل الهماليل = ديم المزون اللي نشت من سحابه
براقها بالليل ضيء القناديل = يشق ستر الليل ويكشف نقابه
من عادته مايتبع القال والقيل = ولامن تكلم في كلامه ذرابه
يحب قول الصدق ومايقبل الميل = واصعب سؤالً مايعـّسره جوابه
للطيب رجْال .. ولـلـرديه رجاجيل = وكلن حسب فعله يفــصّــل ثيابه