منتديات قبيلة الروله الرسميه - عرض مشاركة واحدة

01-16-2009, 03:25 AM

[[ الجــــــــــــــــــــــادة ]]
سلسلة ................قصصية
في حلقات ........منفصلة
سلسلة ........تبحث في قصص.......وأمجاد الأباء والأجداد .....لانتحدث فيها
بل يتحدث فيها رواتها.............عن أنفسهم
[[ الحلقــــــــــة : الثامنــــــــــ( 8 )ـــة ]]

يقول راوي السالفة وهو: زيد بن قشرا الله يرحمه (زيد بن قشرا من عشيرة الصوالحه من الدغمان من الرولة ) ,واللي سولفها عليه رجل ظفيري يقول يومنه عرف أني رويلي وهو يضحك !!قال:آآآه رويلي؟! قلت أيبله رويلي(القائل زيد) ليه تضحك وهو الرويلي يضحك ؟؟! قال لابالله ياولدي والنعم بالروله أهل الفضية اللي يضحكي سالفة جرت عليه أنا ياماحاكيك مع الرولة بالزمن الفايت حول السنة اللي يقال لها كون الأشقر والأشيقر .
((أنا يامحاكيك.... هاك الأيام توني ولد على حين طلعتي وبس أدور العلوم الغانمة والكسب , وهو يجينا العلم أن فيه غزو مقبل علينا من الظفير وجهتهم للرولة , وأحوف على ذلول(ن) لأبوي من أطيب الهجن لها صيت بالحيل عند كل الظفير تراكض الخيل , وهو يعيي لا يخليني أخذها قال: ياولدي سالفة هاذولا ربعك(غزو الظفير) تراهم ماخوذين وأنت تبي تقلع الفلانه(الذلول) يم الرولة !! لا لا ياولدي لا ياشين لا تقلعها للروله لا يلد بالك لربعك تراهم خايب(ن) تعبهم وسعدهم !! هذولا الروله ماهم حياة وهاللحيه ؟!.
ويومنه نام وأسردها وطلب الغزو وأمر بطريقي عرب(ن) لنا وأتوشعهم وأدغف لك صفحة الذلول منشان ترغي ويحسون بي العرب عندهم لهم بنات أبي أعرض عندهن وواريهن حالي أني غزاي مع الغزو!!وألحقهم وخاويهم
ويومنا طبينا على ديار الروله بأطراف الديرة وحنا نحل بهم ونلم لك بهاك العرب منهم وهم خيالتهم يهفونا ويردون البل منا وننوخذ أخيذت(ن) قشرا ؟! آخذو الذود اللي مع الغزو كله وذلول أبوي هي الأوله منهن! وحنا نجيك ناكسين ماخوذين وخايب(ن)سعدنا مثل ماقال أبوي !! وهذا أنا بس أتغمض وألوم حالي على الذلول آآآآآه وويلاه أأأويحي لوا حلا لات يالفلانه ولي توفت وحكي على حالي طول ماحنا بطريقنا لأهلنا .
ونجيك يمهم وهو ينطحني أبوي: ول خاب سعدك قلعتها للروله !! ماطعت شوري ياقليل البخت ! من أول قلت لك ألينك تبي توديها لهم !! ياولد والله ماأنسى غميضتها ابد ابد ,يقوله ابوي لي .
وتجينا علوم جيوش المنتفق وجموعه اللي يجمع بها لغزو الروله وأنها جموع مالها عدد من كل بد بها ؟!! واللي يروسها الشيخ ثامر ولد الشيخ سعدون بن منصور باشا , وأعزم على خوت المنتفق وأبوي عارف(ن) رايي مبطي أني لا أسمع ولا أطيع أبي أجيب له ذلوله اللي عند الروله بأية وسيله ؟! المهم تجي هذا كل همي هاك الساعة , يامار أخت ذلول أبوي عند عمي ووصايفها مثل وصايفها, ويفطن أبوي للي براسي وهو يحذر عمي: خلك حريص من بناخيك لا يسرد منك الذلول ويلحقها بأختها للروله تراه عازم(ن) على غزو الروله مع جيوش المنتفق وهقوتي أنه غير يخاويهم على ذلولك !! مارهاه خلك حريص ,ومانفع عمي حرصه تحيلت به وأسردها منه وأخاوي ربع لنا هدفهم مثل هدفي !!.
ونجيك وجهتنا جيوش المنتفق جهة العراق وناصلهم ياهم قوم(ن) مالها تعداد,وكل هالجيوش والأمم لهم حداة محدة :

يابو ثامر ياسعدون = ياشوق ملولحة الردن
الركايب حفايا = عن بيت النوري ينشدن

ونقولها معهم ونصير نحدى مثلهم , ويمشي بنا ثامر السعدون للروله قلت بقلبي أيه هالمرة ماهي مثل هاك المرة يالروله جيناكم جيناكم بقوم(ن) حمرا ماهم غزو(ن) شويين !! ويصير الكون المعروف كون الأشقر اللي راحت به رجال(ن) مالها تعداد واجد والجنايز ملي لها حفرة بلها قاع , ويهم يحلون راعين العليا بنا وهاته هاته وربعي من الظفير اللي ما ذبح وخذ وسلم برقبته وأنا منهم هو البخيت !!وأول ماوخذت الذلول !! وأهرب على رجليه من المعاره وأجيك يم هاك الروض اللي النزع غاطيه ماينشاف اللي بوسطه وأطيح بوسطه وأخمر أبي أنام متوسدن الليه بويريد(ن) معي ! أبي يامنه جا الليل اسري واهرب لديرتي ونواحيها.
الروله سردوا اللي سردوا من جيوش الأشقر وماتلملم عليها من رجال القبايل , وأنا على مجضاعي يومني اسمع طق حذيان الفرس وأرفع لك راسي شوين ياهذا هو جايك راعي العليا على هاك الشهبا تهذبه خلاوي وتي تي ياما وطت الروض اللي أنا بوسطه مخمر , ويومنه بغى يجنبني وهي الفرس تشوح براسها وهو يلتفت ويشوفني يانا عنده بس أني ماني تحت رجليها !!قال: يله قم وهات اللي معك عده البارود الملويه ويحول عن فرسه وياخذ بارودي ويحطها على متنه وباروده مشهلها بينماه , قال: وش جايبك هنيا ؟؟ أكيد انك هارب مع اللي هربوا من جيوش المنتفق ؟! قلت أيبله يارويلي اللي قلته هو الصحيح وأبي منك السلامة لرقبتي , قال هي لك كانك تعاهدني عهد باللي اقوله لك؟؟! قلت اعاهد قبل ماعرف وشهو ياراعي العليا !! قال أبيك ماتبول طول منت حي يم جهة ديار الروله ...أنت سمعت أنت سمعت ! ماطير الشراب وجهك صوب جهة الروله تعاهد على هذا !! وأعاهده قلت عليك الله وأمان الله أنها لك يارويلي .......وهو يتركني .
وهذا ترى هو اللي أضحكني يوم عرفت أن رويلي يارويلي !! ومن هاك الساعة أليا هالساعة هاذي ياولدي ماعمري طيرت الشراب صوب ديرتكم!! )يتجدد اللقاء بكم ................بأذن الله تعالى
كتبه لكم ....................[[ اخو صيته ]]